Ukraina va Rossiya halok bo‘lgan askarlarning jasadlarini almashdi

Rossiya va Ukraina urush zonasida halok bo‘lgan 200 dan ortiq harbiy xizmatchining jasadini o‘zaro almashdi. Bu haqda RBK xabar berdi. 

Qayd etilishicha, dastlab, kecha, 4 avgust kuni Ukraina tomoni halok bo‘lgan jangchilarining jonsiz tanalari Kiyevga qaytarilganini ma’lum qilgan. Rossiya Davlat Dumasi deputati va Ukrainadagi harbiy amaliyotlar bo‘yicha parlament muvofiqlashtiruvchi guruhi vakili Shamsail Saraliyev ham jasadlar almashinuvi amalga oshirilganini tasdiqlagan. 

“Ha, haqiqatan ham, bugun jasadlarni topshirish Mudofaa vazirligi orqali amalga oshirildi. 44 nafar jasadni Ukraina tomoniga topshirdik. 160 nafar jasadni qaytarib oldik”, deydi u. 

Bunga qadar tomonlar joriy yilning iyul oyida jasadlarni almashgandi. O‘shanda Ukrainaga 62 nafar askarning murdasi qaytarib berilgan bo‘lsa, Rossiya tomoni 160 nafar jasadni qabul qilib olgan. So‘nggi mahbuslar almashinuvi esa 6 iyul kuni amalga oshirilgan. O‘shanda almashinuv “45 ga 45” formulasi bo‘yicha o‘tkazilgan.