Ukraina askarlari 2025 yilda Kurskni tark etishi mumkin – “Bloomberg”

Ukraina bir necha oy ichida Rossiyaning Kursk viloyatida qo‘lga kiritgan hududlarini yo‘qotishi mumkin. Bu haqda kecha, 27 dekabr kuni ismini oshkor qilishni istamagan bir necha AQSH rasmiylariga tayanib, “Bloomberg” xabar berdi.

Nashrning eslatishicha, Ukraina Qurolli kuchlari shu yilning yozida bosib olgan hududning yarmi ustidan nazoratni allaqachon yo‘qotgan. Uning suhbatdoshlari bu Kiyevning Rossiya bilan o‘t ochishni to‘xtatish bo‘yicha ehtimoliy muzokaralardagi pozitsiyasini zaiflashtirishi mumkinligidan xavotirda.

“Bloomberg” manbalariga ko‘ra, bunga Ukraina Qurolli kuchlari saflarida askarlarning yetishmasligi hamda AQSH va boshqa ittifoqchilardan kelajakda qurol-yarog‘ yetkazib berilishi borasidagi noaniqlik sabab bo‘lgan. Shuning uchun ukrainalik harbiylar Kursk viloyatidagi hududni 2025 yilning bahorigacha ushlab turishi mumkin, keyin esa chekinishga majbur bo‘ladi yoki qurshab qolish xavfini tug‘diradi. Ikki suhbatdosh Ukraina Prezidenti Vladimir Zelenskiy og‘ir yo‘qotishlarga yo‘l qo‘ymaslik uchun mintaqadan o‘z vaqtida chekinishga buyruq berishiga umid bildirgan.

Amerika rasmiylarining so‘zlariga ko‘ra, ukrainaliklar Kursk viloyatida kutilganidan ancha uzoqroq turdi, qisman AQSHning Rossiya hududiga chuqur zarba berish uchun Amerika raketalaridan foydalanishga ruxsati tufayli ularning bu hududdan chekinishini hali ham taktik muvaffaqiyat deb hisoblash mumkin.

“Ukrainaning Kursk viloyatiga bostirib kirishi Rossiya chegarasi to‘liq xavfsiz emasligini va boshqa joylardan ham yana buzib kirishi mumkinligini va Rossiyada Amerika qurollaridan foydalanish urushning halokatli avj olishiga olib kelmasligini ko‘rsatdi”, degan ekspertlarning biri.

Uning fikriga ko‘ra, bundan tashqari, bu urush umidsiz ravishda boshi berk ko‘chaga tushib qolgani yo‘q, lekin aslida juda dinamik holatda ekanini ko‘rsatdi.

Eslatib o‘tamiz, joriy yilning noyabr oyida “The Telegraph” gazetasi Rossiya Prezidenti Vladimir Putin 2025 yil 20 yanvarda Donald Trampning AQSHning 47-prezidenti sifatida inauguratsiyasi oldidan bir qismi Ukraina Qurolli kuchlari tomonidan bosib olingan Kursk viloyatini Rossiya nazoratiga qaytarmoqchiligi haqida yozgan edi. G‘arb diplomatlarining nazarida bunday qadam Moskvaga har qanday tinchlik muzokaralariga kuchliroq pozitsiya bilan kirishga imkon beradi. Rossiya armiyasi 6 avgustdan beri Ukraina qo‘shinlari tomonidan bosib olingan hududning qariyb yarmini nazoratga olishga muvaffaq bo‘lgan.