Украина аскарлари 2025 йилда Курскни тарк этиши мумкин – “Bloomberg”

Украина бир неча ой ичида Россиянинг Курск вилоятида қўлга киритган ҳудудларини йўқотиши мумкин. Бу ҳақда кеча, 27 декабрь куни исмини ошкор қилишни истамаган бир неча АҚШ расмийларига таяниб, “Bloomberg” хабар берди.

Нашрнинг эслатишича, Украина Қуролли кучлари шу йилнинг ёзида босиб олган ҳудуднинг ярми устидан назоратни аллақачон йўқотган. Унинг суҳбатдошлари бу Киевнинг Россия билан ўт очишни тўхтатиш бўйича эҳтимолий музокаралардаги позициясини заифлаштириши мумкинлигидан хавотирда.

“Bloomberg” манбаларига кўра, бунга Украина Қуролли кучлари сафларида аскарларнинг етишмаслиги ҳамда АҚШ ва бошқа иттифоқчилардан келажакда қурол-яроғ етказиб берилиши борасидаги ноаниқлик сабаб бўлган. Шунинг учун украиналик ҳарбийлар Курск вилоятидаги ҳудудни 2025 йилнинг баҳоригача ушлаб туриши мумкин, кейин эса чекинишга мажбур бўлади ёки қуршаб қолиш хавфини туғдиради. Икки суҳбатдош Украина Президенти Владимир Зеленский оғир йўқотишларга йўл қўймаслик учун минтақадан ўз вақтида чекинишга буйруқ беришига умид билдирган.

Америка расмийларининг сўзларига кўра, украиналиклар Курск вилоятида кутилганидан анча узоқроқ турди, қисман АҚШнинг Россия ҳудудига чуқур зарба бериш учун Америка ракеталаридан фойдаланишга рухсати туфайли уларнинг бу ҳудуддан чекинишини ҳали ҳам тактик муваффақият деб ҳисоблаш мумкин.

“Украинанинг Курск вилоятига бостириб кириши Россия чегараси тўлиқ хавфсиз эмаслигини ва бошқа жойлардан ҳам яна бузиб кириши мумкинлигини ва Россияда Америка қуролларидан фойдаланиш урушнинг ҳалокатли авж олишига олиб келмаслигини кўрсатди”, деган экспертларнинг бири.

Унинг фикрига кўра, бундан ташқари, бу уруш умидсиз равишда боши берк кўчага тушиб қолгани йўқ, лекин аслида жуда динамик ҳолатда эканини кўрсатди.

Эслатиб ўтамиз, жорий йилнинг ноябрь ойида “The Telegraph” газетаси Россия Президенти Владимир Путин 2025 йил 20 январда Дональд Трампнинг АҚШнинг 47-президенти сифатида инаугурацияси олдидан бир қисми Украина Қуролли кучлари томонидан босиб олинган Курск вилоятини Россия назоратига қайтармоқчилиги ҳақида ёзган эди. Ғарб дипломатларининг назарида бундай қадам Москвага ҳар қандай тинчлик музокараларига кучлироқ позиция билан киришга имкон беради. Россия армияси 6 августдан бери Украина қўшинлари томонидан босиб олинган ҳудуднинг қарийб ярмини назоратга олишга муваффақ бўлган.