UFC jangchisiga aylangan Ro‘ziboyev promoushen reyestridan o‘chirildi

Shu yilning 12 fevral kuni UFC bilan shartnoma imzolagan Mashrabjon Ro‘ziboyev dunyoning eng kuchli ligasi reyestridan chiqarildi. Bu haqda promoushen matbuot xizmati xabar berdi.

Manbaga ko‘ra, viza bilan bog‘liq muammo sabab yengil vazn toifasi vakili Kauye Fernandes Jared Gordonga qarshi jangda ishtirok etolmagan va uning o‘rniga promoushen matchmeykerlari UFC debyutanti, o‘zbekistonlik Mashrabjon Ro‘ziboyevga imkoniyat taqdim etgan. Ammo jangga uch kun qolganda taklifga rozi bo‘lgan aralash yakkakurash ustasi tarozida belgilangan vazn me’yorini qila olmagan.  

Qayd etilishicha, UFC Mashrabjon Ro‘ziboyevga ikkinchi imkoniyatni hozircha bermaslikka qaror qildi va uni tashkilot reyestridan chiqardi. 

Ma’lumot o‘rnida, 28 yoshli Mashrabjon Ro‘ziboyev Nursulton Ro‘ziboyevning ukasi hisoblanadi. 2019 yilda u “Naiza” promoushenida 1 ta, 2021 yilda “Octagon” ligasida ham 1 ta jang o‘tkazdi. Ayni paytda u 7 ta g‘alabali seriya bilan kelmoqda.