O‘FAning cho‘ntagini qoqqan “Paxtakor” stadionining asosiy tribunalari yopib qo‘yildi

O‘zbekiston Professional futbol ligasi (O‘zPFL) tomonidan ishchi guruh tuzilib, Toshkent shahrida joylashgan “Paxtakor” stadionining 44 ta sektoridagi holat o‘rganib chiqildi va stadion tribunalari to‘liq ta’mirga muhtoj ekanligi aniqlandi. Bu haqda O‘zPFL matbuot xizmati xabar berdi.

“Paxtakor” stadioni tribunalari o‘tgan yili bo‘lib o‘tgan U-23 Osiyo kubogida ta’mirga muhtoj ekanligi ma’lum bo‘lgandi. Buning oqibatida O‘zbekiston U-23 termasining Iroqqa qarshi o‘yini vaqtida ko‘ngilsiz holat ro‘y bergan bo‘lib, keyinchalik OFK O‘zbekistonning Yaponiya U-23 termasiga qarshi o‘yiniga futbol muxlislarini kiritmadi, qo‘shimchasiga O‘FA katta miqdorda jarimaga tortildi. 

Ma’lum bo‘lishicha, mazkur voqeadan keyin “Paxtakor” stadioni tribunalari tosh va beton bo‘laklaridan tozalangan. Sektorlar oraliqlarida kichik ta’mirlash ishlari olib borilgan. Ammo kichik ta’mirlash ishlari holatni ijobiy tomonga o‘zgartirmagan.

“Stadion tribunalari yetarli darajada yaxshilanmaganligi O‘zbekiston chempionati 3-turidan o‘rin olgan “Paxtakor” - “Navbahor” uchrashuvida oshkor bo‘ldi. Namanganlik futbol muxlislari joy olgan sektorlardan maydonga qarab tosh hamda beton bo‘laklari uloqtirildi. Har qanday sovuq ob-havo, yog‘ingarchilik yoki muxlislar o‘rtasidagi tartibsizlik beton qoplamaning oson uvalanishiga olib keladi. Oqibatda stadionga qattiq jismlarning uloqtirilishi xavfi oshadi. Bu esa huquqni muhofaza qiluvchi organlar vakillari, futbolchilar, rasmiylar, to‘p uzatib turuvchi bolalarga jiddiy tan jarohati yetkazilishi ehtimolini kuchaytiradi”, deyiladi O‘zPFL xabarida. 

Hozirgi vaqtga kelib stadionda faqatgina 6 ta sektor muxlislarga xizmat ko‘rsatishda davom etadi. O‘z navbatida “Paxtakor” futbol klubi hamda stadioni rahbariyati xizmat ko‘rsatishi to‘xtatilgan sektorlar hamda o‘rindiqlar uchun chiptalar savdosini cheklash, ta’qiqlangan nuqtalarda muxlislar harakatini cheklash uchun sun’iy to‘siqlar o‘rnatish majburiyatini olgan.