Turkiyada terakt sodir qilgan 25 yoshli ayol 1794 yilga qamaldi

Turkiyaning Istanbul shahri Oliy jinoyat sudi 2022 yil noyabr oyida Istiqlol xiyobonida terakt sodir etgan ayolga hukm o‘qidi. Bu haqda  "TRT Haber" ma’lum qildi.

Qayd etilishicha, Ahlam al-Bashir yettita umrbod yoki 1794 yil qamoq jazosiga hukm qilingan. Prokurorlar unga 1949 yildan 3009 yilgacha qamoq jazosini so‘ragan. Al-Bashir “davlat birligi va yaxlitligiga putur yetkazish” va olti kishini “qasddan o‘ldirish” moddalari bo‘yicha aybdor deb topilgan. Shuningdek, u 22 ming lira (taxminan 700 dollar) jarimaga ham tortilgan. 

Ma’lumot uchun, al-Bashir 1999 yilda tug‘ilgan bo‘lib, Suriya fuqarosi hisoblanadi. U 2022 yil 13 noyabr kuni Istanbul markazidagi Istiqlol ko‘chasida bomba solingan sumkani qo‘yib ketgan. Sayyohlar bilan gavjum ko‘chadagi portlash oqibatida 6 kishi halok bo‘lib, 99 kishi yaralangan. Ayol kuzatuv videokameralaridagi yozuvlar orqali aniqlanib, yashiringan uyida hibsga olingan. 

Turkiya hukumati terakt ortida Kurdiston ishchilar partiyasi turganini aytgandi.