Туркияда теракт содир қилган 25 ёшли аёл 1794 йилга қамалди

Туркиянинг Истанбул шаҳри Олий жиноят суди 2022 йил ноябрь ойида Истиқлол хиёбонида теракт содир этган аёлга ҳукм ўқиди. Бу ҳақда  "TRT Haber" маълум қилди.

Қайд этилишича, Аҳлам ал-Башир еттита умрбод ёки 1794 йил қамоқ жазосига ҳукм қилинган. Прокурорлар унга 1949 йилдан 3009 йилгача қамоқ жазосини сўраган. Ал-Башир “давлат бирлиги ва яхлитлигига путур етказиш” ва олти кишини “қасддан ўлдириш” моддалари бўйича айбдор деб топилган. Шунингдек, у 22 минг лира (тахминан 700 доллар) жаримага ҳам тортилган. 

Маълумот учун, ал-Башир 1999 йилда туғилган бўлиб, Сурия фуқароси ҳисобланади. У 2022 йил 13 ноябрь куни Истанбул марказидаги Истиқлол кўчасида бомба солинган сумкани қўйиб кетган. Сайёҳлар билан гавжум кўчадаги портлаш оқибатида 6 киши ҳалок бўлиб, 99 киши яраланган. Аёл кузатув видеокамераларидаги ёзувлар орқали аниқланиб, яширинган уйида ҳибсга олинган. 

Туркия ҳукумати теракт ортида Курдистон ишчилар партияси турганини айтганди.