Туркия Исроилни COP31 Етакчилар саммитига чақирмади

Туркия Анталияда ўтказилаётган БМТнинг Иқлим ўзгариши бўйича 31-конференцияси (COP31) доирасидаги Етакчилар саммитида иштирок этиш учун Исроил ҳукуматига таклифнома юбормади. Бу ҳақда COP31 раиси, Туркия атроф-муҳит, шаҳарсозлик ва иқлим ўзгариши вазири Мурат Курум маълум қилди.

“Тадбир ташкилотчилиги доирасида етакчиларга таклифномаларни мезбон мамлакат, яъни Туркия юборади. Биз Исроил ҳукуматини етакчилар учрашувига таклиф қилмадик. Шу билан бирга, ҳар бир мамлакат БМТ шафелигидаги музокараларда иштирок этиш, ўз позициялари, баёнотлари ва лойиҳаларини тақдим этиш ҳуқуқига эга. Шу сабабли БМТ томонидан ташкил этиладиган тадбирларга дунёнинг барча мамлакатлари таклиф этилади. Аммо Етакчилар саммитига биз мезбон давлат сифатида Исроилга таклифнома юбормадик”, дейди у.

Вазирнинг қўшимча қилишича, иқлим конференциясининг ўтказилиши Анқаранинг Исроилга бўлган муносабатини ўзгартирмайди.

“Бу ерда биз иқлимни, иқлим адолатини муҳокама қиламиз. Тинчлик бўлмаган жойда иқлим адолати ҳам бўлиши мумкин эмас. Шу сабабли ушбу учрашув [COP31] Туркиянинг Исроил давлати ва ҳукуматига нисбатан позициясини ўзгартирмайди”, дея тушунтирган Курум.

У Туркия “Ғазодаги геноцид ҳақида сукут сақламаслигини” таъкидлаган ҳамда “COP31 майдонидаги энг катта залга “Ғазо” номи берилганини” қайд этган. 

“Бу 6 250 кишига мўлжалланган конференция залидир. Бу ерда Ғазо болаларининг геноцид ҳақида ҳикоя қилувчи расмлари кўргазмалари ўтказилади. Шунингдек, фаластинлик рассомларнинг фожиа, уруш, адолатсизлик ва геноцидга бағишланган асарлари тақдим этилади. Сиёсий позициямиз аниқ ва биз бутун конференция давомида унга амал қиламиз”, дейди вазир.

Маълумот учун, БМТнинг Иқлим ўзгариши бўйича томонлар анжуманининг 31-сессияси (COP31) – глобал иқлим инқирозига қарши курашиш, иссиқхона газлари чиқиндиларини камайтириш ва барқарор ривожланишни таъминлаш масалаларига бағишланган халқаро олий даражадаги саммит. 

Туркиянинг Анталия шаҳрида ўтказилаётган ушбу глобал форумда дунё давлатлари ва ҳукумат раҳбарлари, халқаро ташкилотлар, экология вазирликлари ва экспертлар иштирок этмоқда. Саммитнинг асосий кун тартибидан Париж иқлим битими мақсадларига эришиш, “иқлим адолати”ни таъминлаш, ривожланаётган мамлакатларга экологик трансформация учун молиявий ёрдам ажратиш ҳамда қайта тикланадиган энергия манбаларига ўтишни жадаллаштириш каби муҳим масалалар ўрин олган. COP31 нафақат экологик муаммолар, балки глобал хавфсизлик ва ижтимоий тенгликнинг иқлим омиллари билан боғлиқлигини муҳокама қилиш учун асосий халқаро платформа бўлиб хизмат қилмоқда.

Эслатиб ўтамиз, аввалроқ Туркияда бўлиб турган Ўзбекистон Республикаси Президенти Шавкат Мирзиёев Иқлим ўзгаришига қарши курашиш соҳасидаги ҳаракатлар бўйича Жаҳон саммитининг очилиш маросимида иштирок этгани ҳақида хабар берилган эди.