Turkiya, Bolgariya va Gretsiyada suv toshqinlari oqibatida 11 kishi halok bo‘ldi

Turkiya, Bolgariya va Gretsiyadagi suv toshqinlari 11 kishining hayotiga zomin bo‘ldi. Bu haqda mamlakatlarning ommaviy axborot vositalari xabar berdi.

Turkiya Ichki ishlar vaziri Ali Yerlikaya Istanbulda suv toshqini oqibatida ikki kishi halok bo‘lganini, Igneada shahrida yana besh kishi vafot etganini, bir kishi bedarak yo‘qolganini ma’lum qilgan.

“CNN Greece” Gretsiyada ikki kishining o‘limi haqida xabar berdi. Bolgariyaning “Novinite” agentligiga ko‘ra, Sarevo shahrida ikki kishi halok bo‘lgan.

Ali Yerlikaya Istanbuldagi sel oqibatida 31 kishining tan jarohati olib, ulardan 8 nafarining shifoxonaga yotqizilganini bildirgan. Suv toshqini 5 sentyabrda boshlangan kuchli yomg‘irdan keyin sodir bo‘lgan.

“TRT Haber”ga ko‘ra, Igneadada halok bo‘lgan besh kishi bungalo (ba’zi tropik mamlakatlarda kichik qishloq uyi) ijaraga olgan sayyohlar bo‘lgan. Uyda jami 12 kishi istiqomat qilgan, suv toshqini oqibatida binoni suv oqimi yuvib ketgan. Yo‘qolgan sayyohni qidirish davom etmoqda.

“CNN Greece” telekanalining xabar berishicha, Gretsiyaning tarixiy Fessaliya viloyatida suv toshqinlari sababli favqulodda holat e’lon qilingan va uning hududida transport harakati taqiqlangan.

Gretsiya meteorologiya xizmati prognoziga ko‘ra, mintaqada noqulay ob-havo 7 sentyabrgacha davom etadi. Vafot etgan 87 yoshli ayolning jasadi Palsis viloyatida topilgan, Volos shahrida yashovchi 51 yoshli erkak ham suv toshqini oqibatida vafot etgan. Bundan tashqari, ikki kishi bedarak yo‘qolganlar ro‘yxatida.

Bolgariyada kuchli yomg‘ir Sarevo shahrida suv toshqiniga olib kelgan. Shahar meri Georgiy Lapchev “Novinite” nashriga ikki kishi halok bo‘lganini tasdiqlab, yana uch kishi bedarak yo‘qolganini bildirgan.

Yomg‘ir tufayli Ropotamo va Qoraog‘och daryolari qirg‘oqlaridan toshib ketgan. Ko‘priklarning vayron bo‘lishi tufayli Axtopol shahri, shuningdek, Varvara, Sinemorey va Rezovo qishloqlari butunlay izolyatsiya qilingan.