To‘palang daryosidan yana bir noyob topilma chiqdi

Surxondaryo viloyati Sariosiyo tumanidagi To‘palang daryosi o‘ng qirg‘og‘idan bronzadan quyma uslubda yasalgan ot haykalchasi topildi.

Viloyat turizm va madaniy meros bosh boshqarmasi mas’ul xodimi Bekzod O‘raqovga ko‘ra, haykalcha To‘palang daryosining bundan oldin Mirzo Ulug‘bek zarb ettirgan tangalar topilgan Alisher Navoiy nomli mahalla hududidan oqib o‘tuvchi qismidan chiqqan.

“Ot haykalchasi ham ana shu yerdan topib olingan bo‘lib, u kelgusida hudud tarixini o‘rganishda muhim manba bo‘lib xizmat qilishi mumkin”, dedi O‘raqov.

Termiz arxeologiya muzeyiga topshirilgan ot haykalchasi mutaxassislar tomonidan chuqur o‘rganilib, dastlabki xulosa berilgan.

Qadimshunoslar fikricha, 91,57 gramm o‘lchamga ega bronza ot haykalchasi To‘palang daryosi ichida Mirzo Ulug‘bek nomidan XV asrga oid tangalar bilan bir joydan topilgani uchun shu asr bilan davriylashtirildi. Kelgusida bu yerda olib boriladigan tadqiqot ishlari mazkur topilma sanasini yanada oydinlashtiradi.

Avvalroq Surxondaryoning To‘palang daryosi qirg‘og‘idan “Ulug‘bek xazinasi” topilganligi haqida xabar bergan edik. Qadimiy tangalarning bir tomonida olti qirrali yulduz va olti yaproqli gul zarb qilingan bo‘lib, bu hukmdorning buyuk astronom va matematikligi tufayli kiritilgan belgilardir. Shuningdek, tangalarning reversida, ya’ni bet tarafida “Samarqand”, “Adliyya” so‘zlari, hijriy 823 (1420 yil), 832 (1428 yil) kabi zarb qilingan yillari aks etgan.