Sement narxi tushdi, oltin va benzin ko‘tarildi

Shu yilning 9-13 sentyabr kunlari O‘zbekiston tovar xomashyo birjasida o‘tkazilgan birja savdo natijalariga ko‘ra birja bozorining turli tovar segmentlarida narxlar dinamikasi turli yo‘nalishlar bo‘yicha shakllanib bordi.

Ko‘rib chiqilayotgan davr mobaynida 3 ming 572,3 tonna AI-91 rusumli benzin birja savdolariga qo‘yildi va sotildi. So‘nggi savdo haftasida AI-91 rusumli benzini bo‘yicha shakllangan birja kotirovkasi tovarning bir tonnasi uchun 6451,2 ming so‘mni, uning boshlang‘ich narxi esa – 6 ming 266,3 ming so‘mni tashkil etdi. AI-91 rusumli benzinning haftalik kotirovkasi avvalgi haftaga nisbatan jami 0,7 foizga o‘sdi.

O‘tgan haftada suyultirilgan gaz ishlab chiqaruvchilari birja savdolari orqali 20,5 mlrd so‘mlik 5 ming 19 tonna suyultirilgan gaz sotishdi. Gazning birjada shakllangan narxi oldingi haftaga nisbatan 3,5 foizga pasayib, bir tonna uchun 4 ming 84,3 ming so‘mni tashkil etdi. Savdolarda xaridor sifatida suyultirilgan gazni sotish huquqini beruvchi litsenziyaga ega korxonalar qatnashishdi.

Qora metall bozorida talab o‘sib bormoqda. ST 12-35 GS armaturaning narxi 7,3 foizga ko‘tarilib, bir tonnasi uchun 5 ming 779,3 ming so‘mni tashkil etdi. Birja orqali sotilgan barcha turdagi qora metallning hajmi jami 6 ming 769,0 tonnani tashkil qilgan. Qora metall sotuvchilari “O‘zmetkombinat” AJ tarkibiga kiruvchi korxonalar hisoblanadi.

O‘sish dinamikasi shuningdek qimmatbaho metallar bozorida ham qayd etildi. Savdo yakunlariga ko‘ra O‘zRTXB da 135,9 million so‘mlik 300 gr Au-1 markali oltin sotilgan. Birja savdolarida sotuvchi sifatida “Olmaliq KMK” AJ ishtirok etdi. Birja kotirovkasi so‘nggi savdo yakunlariga nisbatan 14,6 foizga oshib, 1 gramm oltin uchun 453,1 ming so‘mni tashkil qilgan.

Sement bozori qurilish mavsumining yakuniy bosqichida narxlar trendi pasayishini namoyon etmoqda. PS M-400 D-20 sement bo‘yicha narxlar avvalgi haftaga nisbatan 2,5 foizga pasayib, 479,6 ming so‘mni tashkil qildi. Faol sotilayotgan boshqa markali sementlarning narxlar diapazoni 376,6 - 485,0 ming so‘mni tashkil etmoqda.

Birjada paxta tolasi uchun yuqori darajadagi talab saqlanmoqda. O‘tgan hafta 1 nav 4 tip (o‘rta klass)dagi paxta tolasi bo‘yicha narxlar 1,9 foizga o‘sib, bir tonna uchun 13,1 mln so‘mni tashkil etdi. Paxta tolasini boshqa navlarining narxlari o‘rtacha 10,9 million so‘mdan 13,6 million so‘mgacha bo‘ldi. Birja savdolarida asosan paxta tolasini qayta ishlash quvvatiga ega mahalliy to‘qimachilik korxonalari ishtirok etdi.