Trampning odami Putin bilan nimani gaplashdi?

Rossiya Prezidenti Vladimir Putin va AQSH Prezidentining maxsus elchisi Stiv Uitkoffning Sankt-Peterburgdagi uchrashuvi kabi aloqalar foydali va samarali. Bu haqda Rossiya Prezidenti matbuot kotibi Dmitriy Peskov ma’lum qildi. 

Uning so‘zlariga ko‘ra, bunday muzokaralar Amerika va Rossiya rahbarlariga axborotni “birinchi qo‘ldan” olish imkonini beradi. Kreml vakilining aytishicha, Stiv Uitkoff bilan muzokaralarda Vladimir Putin va Donald Trampning ehtimoliy uchrashuvi batafsil muhokama qilinmagan.

“Uchrashuv mavzusi batafsil muhokama qilinmadi, chunki har qanday uchrashuvga, albatta, puxta tayyorgarlik ko‘rish kerak”, dedi Peskov.

Jurnalistlarning Vladimir Putin va Stiv Uitkoff o‘rtasidagi muzokaralardan so‘ng Rossiya va AQSH pozitsiyalari yaqinlashib qoldimi, degan savoliga Dmitriy Peskov shunday javob berdi:

“Muhokama qilinayotgan masalalar juda va juda murakkab, shuning uchun biron bir zudlik bilan natija kutishni oqlab bo‘lmaydi. Ish davom etmoqda”.

Shu bilan birga, u tomonlar “bir-biriga ma’lumot uzatish uchun juda zarur kanal” topilganini ta’kidladi.

“Muayyan masalalar bo‘yicha pozitsiyaning turli elementlarini davlat rahbaridan yetkazish mumkin bo‘lgan kanal, bu, albatta, hamkasblarning ma’lumotni birinchi qo‘ldan olishini ta’minlashga yordam beradi”, dedi Kreml vakili.

Vladimir Putin va Stiv Uitkoff o‘rtasidagi uchrashuv 11 aprel kuni Sankt-Peterburgda Prezident kutubxonasi binosida bo‘lib o‘tdi. Muzokaralardan so‘ng Dmitriy Peskov uchrashuv tafsilotlari sir saqlanishini aytdi. Shu bilan birga, u Rossiya Prezidenti va AQSH Prezidentining maxsus vakili Rossiya-Ukraina mojarosini tartibga solishni muhokama qilganini bildirdi.

Oq uy esa Uitkoffning Rossiyaga tashrifini Ukrainada tinchlikka erishish yo‘lidagi qadam deb atadi.