Trampning odami bugun G‘azoga boradi

AQSH Prezidenti Donald Trampning Yaqin Sharq bo‘yicha maxsus vakili Stiv Uitkoff va AQSHning Isroildagi elchisi Mayk Xakabi bugun, 1 avgust kuni G‘azoga borib, yordam tarqatiladigan joylarni ko‘zdan kechiradi va g‘azoliklar bilan uchrashadi. Bu haqda kecha, 31 iyul kuni Oq uy matbuot kotibi Kerolayn Livitt ma’lum qildi.

Ma’muriyat rasmiylarining qamal ostidagi G‘azo sektoriga rejalashtirilgan safari global miqyosda ham, MAGA doiralari ichida ham G‘azodagi vaziyatga aralashish uchun bosim kuchayib borayotgan bir paytda, shuningdek, sentyabr oyida bo‘lib o‘tadigan Birlashgan Millatlar Tashkiloti Bosh Assambleyasi yig‘ilishi oldidan Falastin davlatchiligini qo‘llab-quvvatlashni rejalashtirgan AQSH ittifoqchilarining bir qator deklaratsiyalari fonida sodir bo‘ldi.

“Ertaga maxsus elchi Uitkoff va elchi Xakkabi joriy tarqatish joylarini tekshirish va ko‘proq oziq-ovqat yetkazib berish rejasini ta’minlash uchun G‘azoga boradi va bu dahshatli vaziyat haqida birinchi qo‘ldan eshitish uchun mahalliy g‘azoliklar bilan uchrashadi”, dedi Livitt matbuot brifingida.

Livittning so‘zlariga ko‘ra, Uitkoff va Xakabi kecha, 31 iyul kuni Isroil Bosh vaziri Binyamin Netanyaxu bilan “juda samarali uchrashuv” o‘tkazgan va ular G‘azoga oziq-ovqat va yordam yetkazib berishni muhokama qilgan.

“Uitkoff va Xakabi tashrifidan so‘ng Prezident Donald Trampga mintaqaga oziq-ovqat va yordam tarqatish bo‘yicha yakuniy rejani tasdiqlash uchun ma’lumot berishmoqchi”, dedi Livitt.

O‘tgan hafta oxirida xalqaro yordam tashkilotlari G‘azoda yashovchi 2,1 millionga yaqin falastinlik ochlik xavfiga duch kelganidan so‘ng, Isroilning yordamni to‘sib qo‘ygani haqidagi global norozilik qaynoq nuqtaga yetdi. 28 iyul kuni Tramp vaziyatning og‘irligini tan oldi va jurnalistlarga “haqiqiy ochlik” borligini aytdi. Shunday bo‘lsa-da, Tramp Falastin davlatchiligini qo‘llab-quvvatlash takliflarini rad etdi va 31 iyul kuni “G‘azodagi gumanitar inqirozni tugatishning eng tezkor yo‘li – HAMASning taslim bo‘lishi va garovga olinganlarni ozod qilishidir!!!” degan xabarni e’lon qildi.
Eslatib o‘tamiz, oldinroq Tramp jurnalistlarga Uitkoff keyinchalik Rossiyaga borishini aytgan, biroq qo‘shimcha ma’lumot bermagandi.