Tramp jurnalist maxfiy chatga qanday kirganini oshkor qildi 

“Atlantic” nashri bosh muharriri Jeffri Goldberg Vashington ma’muriyati rasmiylari AQSHning Yamandagi zarbalarini muhokama qilgan yopiq messenjer guruhiga kiritilgan, chunki uning raqami AQSH milliy xavfsizlik bo‘yicha maslahatchisi Mayk Uoltsning qo‘l ostidagilaridan birining telefonida saqlangan. Bu haqda AQSH Prezidenti Donald Tramp kecha, 25 mart kuni “Newsmax” telekanaliga bergan intervyusida aytib o‘tdi.

“Biz ishonamizki, kimdir buning uchun ruxsat olgan holda liniyada bo‘lgan. Mayk Uolts bilan aloqador kimdir, uning qo‘l ostida past darajada ishlagan kimdir. Men tushunganimdek, uning telefonida Goldbergning raqami bo‘lgan. Va negadir bu yigit chatga qo‘shilgan”, dedi Tramp sodir bo‘lgan voqea sabablari haqida gapirar ekan.

Amerika rahbari guruh hech qanday maxfiy ma’lumotni e’lon qilmaganiga ishontirdi.

“U yerda hech qanday maxfiy ma’lumot yo‘q edi. Hech qanday muammo yo‘q edi. Hujum nihoyatda muvaffaqiyatli bo‘ldi”, deya qo‘shimcha qildi u.

Tramp avvalroq ma’lumotlar buzilganiga qaramay, milliy xavfsizlik bo‘yicha jamoasining barcha a’zolariga, jumladan Uoltsga ham ishonch bildirgan edi.

Uolts, o‘z navbatida, Goldberg nima uchun yopiq guruhga kiritilganini bilmasligini aytdi. U bu jurnalist bilan tanish emasligiga ishontirdi.

Ma’lumot uchun, 24 mart kuni Goldberg 11 mart kuni Mayk Uolts ismli foydalanuvchidan Signal messenjeriga ulanish so‘rovini olgani haqida maqola e’lon qildi. Ikki kundan keyin jurnalist AQSH ma’muriyati a’zolari Yamanga zarba berishni muhokama qilayotgan guruh chatga qo‘shilgani haqida xabar oldi.

15 mart kuni, muharrirning ta’kidlashicha, Pit Hegset (Pentagon rahbarining ismi) ismli foydalanuvchi Yamandagi husiylarga qarshi bo‘lajak zarbalar tafsilotlari, jumladan nishonlar, qurollar va zarbalarning kutilayotgan boshlanish vaqtini o‘z ichiga olgan xabarni joylashtirdi.

Jurnalistning so‘zlariga ko‘ra, Oq uy Milliy xavfsizlik kengashi matbuot kotibi Brayan Xyuz unga Signal guruhi suhbatining haqiqiyligini tasdiqlagan.