Трамп журналист махфий чатга қандай кирганини ошкор қилди 

“Atlantic” нашри бош муҳаррири Жеффри Голдберг Вашингтон маъмурияти расмийлари АҚШнинг Ямандаги зарбаларини муҳокама қилган ёпиқ мессенжер гуруҳига киритилган, чунки унинг рақами АҚШ миллий хавфсизлик бўйича маслаҳатчиси Майк Уолтцнинг қўл остидагиларидан бирининг телефонида сақланган. Бу ҳақда АҚШ Президенти Дональд Трамп кеча, 25 март куни “Newsmax” телеканалига берган интервьюсида айтиб ўтди.

“Биз ишонамизки, кимдир бунинг учун рухсат олган ҳолда линияда бўлган. Майк Уолтц билан алоқадор кимдир, унинг қўл остида паст даражада ишлаган кимдир. Мен тушунганимдек, унинг телефонида Голдбергнинг рақами бўлган. Ва негадир бу йигит чатга қўшилган”, деди Трамп содир бўлган воқеа сабаблари ҳақида гапирар экан.

Америка раҳбари гуруҳ ҳеч қандай махфий маълумотни эълон қилмаганига ишонтирди.

“У ерда ҳеч қандай махфий маълумот йўқ эди. Ҳеч қандай муаммо йўқ эди. Ҳужум ниҳоятда муваффақиятли бўлди”, дея қўшимча қилди у.

Трамп аввалроқ маълумотлар бузилганига қарамай, миллий хавфсизлик бўйича жамоасининг барча аъзоларига, жумладан Уолтцга ҳам ишонч билдирган эди.

Уолтц, ўз навбатида, Голдберг нима учун ёпиқ гуруҳга киритилганини билмаслигини айтди. У бу журналист билан таниш эмаслигига ишонтирди.

Маълумот учун, 24 март куни Голдберг 11 март куни Майк Уолтц исмли фойдаланувчидан Signal мессенжерига уланиш сўровини олгани ҳақида мақола эълон қилди. Икки кундан кейин журналист АҚШ маъмурияти аъзолари Яманга зарба беришни муҳокама қилаётган гуруҳ чатга қўшилгани ҳақида хабар олди.

15 март куни, муҳаррирнинг таъкидлашича, Пит Ҳегсет (Пентагон раҳбарининг исми) исмли фойдаланувчи Ямандаги ҳусийларга қарши бўлажак зарбалар тафсилотлари, жумладан нишонлар, қуроллар ва зарбаларнинг кутилаётган бошланиш вақтини ўз ичига олган хабарни жойлаштирди.

Журналистнинг сўзларига кўра, Оқ уй Миллий хавфсизлик кенгаши матбуот котиби Брайан Хьюз унга Signal гуруҳи суҳбатининг ҳақиқийлигини тасдиқлаган.