“Tramp zamonamiz Gitleri”. Restoranga borgan Prezidentni namoyishchilar qarshi oldi (video)

AQSH Prezidenti Donald Tramp kecha, 9 sentyabr kuni kechqurun Oq uy darvozalaridan bir yarim kvartal uzoqlikda joylashgan restoranda kechki ovqatlanish uchun chiqdi. Restoranda Prezident uni “zamonamiz Gitleri” deb atagan namoyishchilar tomonidan qarshi olindi. Holat aks etgan videolar tarmoqlarda keng tarqalmoqda.

Tramp Oq uydan “Joe’s Seafood, Prime Steak & Stone Crab” restoraniga yurib bordi. Uning maqsadi poytaxtda jinoyatchilikka qarshi olib borilayotgan federal choralar samara bermoqda, degan fikrni uyg‘otish edi. Ammo restoran ichiga kirib borar ekan, namoyishchilar uni haqoratli shiorlar bilan qarshi oldi.

“Ozod Kolumbiya okrugi (AQSH poytaxti, Vashington), Ozod Falastin. Tramp zamonamiz Gitleri (Free D.C., Free Palestine. Trump is the Hitler of our time )”, deya hayqirdi qo‘llarida Falastin bayrog‘ini ko‘targan namoyishchilar.

Tramp uchun bu tashrif g‘alaba nishoni bo‘lishi kerak edi. U restoranga kirishdan avval jurnalistlarga shunday degandi: 

“Biz Vashingtonning markazida turibmiz. Bu mamlakatdagi eng xavfli shaharlardan biri edi. Endi esa mamlakatning eng xavfsiz joylaridan biriga aylandi”. 

Biroq ichkarida sodir bo‘lgan holat Tramp uchun muvaffaqiyat emasdi. Prezident namoyishchilar bilan shunday to‘qnashishi kamdan kam sodir bo‘ladi. Chunki u lavozimga kirishganidan beri, asosan, Oq uyda yoki Florida, Virdjiniya va Nyu-Jersidegi shaxsiy klublarida ko‘p vaqt o‘tkazgan. Ammo so‘nggi vaqtlarda Tramp jamoat joylariga ko‘proq chiqishga moyillik ko‘rsatmoqda. 7 sentyabr kuni u Nyu-Yorkda bo‘lib o‘tgan AQSH Ochiq chempionati (U.S. Open) finalida qatnashdi va u yerda uni qarshilagan ommadan ham hushtakbozlik, ham qo‘llab-quvvatlash ovozlari eshitildi. Ertaga esa u 11 sentyabr hujumlari xotirasi munosabati bilan Nyu-Yorkda “Yankees” o‘yiniga tashrif buyurishni rejalashtirgan.

Bu Trampning yanvarda Oq uyga qaytganidan beri Vashingtondagi restoranda birinchi marta ovqatlanishi edi. Birinchi prezidentlik davrida u Oq uydan yaqinidagi “Trump International Hotel” mehmonxonasiga tez-tez borardi, lekin u mehmonxona 2022 yilda yopilgan.

Kecha kechqurun Tramp bilan birga vitse-prezident Jeyms Devid Vens, Davlat kotibi Marko Rubio, Urush vaziri Pit Hegset va Oq uyning boshqa yuqori amaldorlari ovqatlandi. Oq uy Matbuot kotibi Kerolayn Livittning aytishicha, ular krab, mayda bahoriy mahsulotlar, salat, steyk va shirinlik yegan.

“Ovqat ajoyib, xizmat ko‘rsatish esa a’lo darajada edi,” dedi Livitt xonim.

Prezident Tramp o‘tgan oy poytaxt Vashingtonda jinoyatchilikka qarshi kurash doirasida Milliy gvardiyani joylashtirgan edi. Oq uy o‘shandan beri “jinoyatchilik bo‘yicha favqulodda holat” e’lon qilinganidan so‘ng qo‘lga olinganlarning sonini faxr bilan e’lon qilib kelmoqda. Biroq ushbu qo‘lga olishlarning ko‘pchiligi mayda huquqbuzarliklar bilan bog‘liq bo‘lib, Vashington prokuraturasi ayrim ishlarni ayblov qo‘ya olmagani uchun yengilroq ayblovga tushirgan, yoki umuman bekor qilgan.