Tramp qudasini yuqori lavozimga tayinladi

AQSHning saylangan prezidenti Donald Tramp o‘zining qudasi Massad Bulosni Yaqin Sharq masalalari bo‘yicha maslahatchi qilib tayinladi. Bu haqda u o‘zining Truth Social platformasidagi sahifasida ma’lum qildi.

Ma’lumotga ko‘ra, milliarder tadbirkor Massad Bulos Oq uyning Arab va Yaqin Sharq masalalari bo‘yicha katta maslahatchisi lavozimini egallaydi. Tramp uning mohir huquqshunos va xalqaro maydonda katta tajribaga ega ekani, biznes olamida yetakchi roli borligi haqida ta’kidlagan.

“U uzoq vaqtdan beri respublikachilar va konservativ qadriyatlar tarafdori bo‘lib, mening saylov kampaniyamga katta foyda keltirgan va Arab-Amerika jamoasi bilan yangi ulkan ittifoqlar tuzishda hal qiluvchi rol o‘ynagan”, degan Tramp.

Shuningdek, u Massadning Yaqin Sharqdagi tinchlik tarafdori ekani, Qo‘shma Shtatlar va uning manfaatlari uchun kuchli himoyachi bo‘lishiga ishonch bildirgan.

Saylov kampaniyasining yakuniy bosqichida Bulos Tramp bilan birga arab-amerikaliklar tayanchi bo‘lgan Michigan shtatining Dirborn shahrida saylovoldi tadbirlarda ishtirok etgan. Tramp Bulosni Michigan shtatini demokratlardan respublikachilar foydasiga o‘zgartirishga ko‘rsatgan yordami uchun minnatdor bo‘lgan.

Ma’lumot uchun, Massad Bulos Trampning kuyovi Maykl Bulosning otasi bo‘lib, u asli Livanda tug‘ilgan. U hozirgi kunda Nigeriyada joylashgan Boules Enterprises kompaniyasini boshqaradi. Mazkur kompaniya mexanik uskunalar va mototsikllarni ishlab chiqarish va tarqatish bilan shug‘ullanadi.

Eslatib o‘tamiz, avvalroq AQSHning saylangan prezidenti Donald Tramp Ukrainadagi urushni tinch yo‘l bilan hal qilish bo‘yicha o‘zining maxsus vakili lavozimiga iste’fodagi general-leytenant Kit Kellogni nomzod sifatida ko‘rsatgandi. 80 yoshli Kellog nomzodi hali ham AQSH Senati tomonidan tasdiqlanishi kerak, biroq respublikachilar Kongressning yuqori palatasida ko‘pchilik o‘rinni qo‘lga kiritganini hisobga olsak, Trampning yo‘lida hech qanday to‘siq bo‘lmasligi kerak.

Mohinur Karimova