Tramp BRICS'ga tahdid qildi

AQSH Prezidenti Donald Tramp BRICS davlatlari xalqaro to‘lov vositasi sifatida AQSH dollaridan voz kechsa, 100 foizlik bojlar joriy qilish bilan tahdid qildi. Bu haqda u kecha, 30 yanvar kuni o‘zining Truth Social tarmog‘ida yozdi.

“BRICS mamlakatlari dollardan uzoqlashishga harakat qilmoqda, biz esa kuzatib turibmiz, degan fikr tugadi. Biz bu mamlakatlardan yangi BRICS valyutasini yaratmaslik va qudratli AQSH dollari o‘rnini bosadigan boshqa valyutani qo‘llab-quvvatlamaslik majburiyatlarini talab qilamiz”, deb yozdi Tramp.

AQSH Prezidenti aks holda “ular 100 foizli tariflarga duch kelishi va o‘z tovarlarini AQSHning ajoyib bozorida sotish imkoniyati bilan xayrlashishi kerak”ligi bilan tahdid qildi.

north_east

Putinga “BRICS puli” sovg‘a qilindi

“Ular boshqa so‘rg‘ich millatni topishlari mumkin. BRICS'ning xalqaro savdoda AQSH dollarini o‘rnini egallashiga hech qanday imkoniyati yo‘q va bunga harakat qilgan har qanday davlat Amerika bilan xayrlashishiga to‘g‘ri keladi", deya ta’kidladi AQSH Prezidenti.

Ma’lumot uchun, BRICS guruhi dastlab besh a’zodan iborat edi: Braziliya, Rossiya, Hindiston, Xitoy va Janubiy Afrika. Ularga 2024 yil boshida Eron, Misr, Efiopiya va Birlashgan Arab Amirliklari qo‘shildi.

Rossiya Prezidenti Vladimir Putin Amerika valyutasining hukmronligini bir necha bor tanqid qilib, BRICS doirasida mustaqil to‘lov va hisob-kitob tizimini yaratish niyatini e’lon qildi. AQSH dollari hozirda global to‘lov operatsiyalarida eng muhim valyuta hisoblanadi. Moskva muqobil, G‘arbiy bo‘lmagan valyutani joriy etish G‘arbning Ukrainadagi urushi tufayli qo‘llagan jazolari ta’sirini kamaytirish imkonini beradi, deb umid qilmoqda. Urush fonida G‘arb davlatlari Rossiyaga qarshi sanksiyalar kiritdi, bu esa ayniqsa uning moliyaviy sektoriga qattiq ta’sir qildi.

Donald Tramp 2017 yildan 2021 yilgacha bo‘lgan birinchi prezidentlik davrida tariflardan bosim vositasi sifatida foydalangan. Iqtisodchilarning fikricha, katta tariflar AQSHda narxlarning oshishiga olib keladi.