Tramp AQSH tarixidagi eng korrupsioner prezident kimligini aytdi

Sobiq prezident Donald Tramp Prezident Jo Baydenni "aql-zakovati past" va tarixdagi "eng korrupsioner" prezident deb qoraladi. Bu haqda u chorshanba kuni o‘z nutqida aytib o‘tdi.

"Jo Bayden – aql-zakovati past odam. U Qo‘shma Shtatlar tarixidagi eng yomon, eng qobiliyatsiz va eng poraxo‘r prezident", deydi Tramp Ayova shtatida o‘z tarafdorlari qarshisidagi chiqishida.

Ma’lumot o‘rnida, Vakillar palatasi spikeri Mayk Jonson avvalroq, Bayden oilasi a’zolariga chet elliklardan millionlab dollar o‘tganini, shuningdek, prezident oilasining chet ellik mijozlari bilan o‘zaro aloqalarini fosh etgandi. U Vakillar palatasi tomonidan Baydenga qarshi impichment jarayoni doirasida qo‘shimcha tergov o‘tkazishga ruxsat beruvchi rezolyutsiya qabul qilinishiga ham izoh bergan.

Bayden o‘z raqiblarining harakatlarini "yolg‘onga asoslangan hujum", tergovni esa qonunchilar vaqtini behuda sarflayotgan "asossiz siyosiy hiyla" deb atagandi.

Eslatib o‘tamiz, Tramp avvalroq Bayden AQSHni Uchinchi jahon urushiga yetaklayapti, deya iddao qilgandi.