Toshkentning ikki tumanida transformator yonib ketdi

Ijtimoiy tarmoqlarda Toshkent shahrining ikki tumanida “elektroshit” yonayotgani aks etgan videolar tarqaldi. Holat bo‘yicha poytaxt Favqulodda vaziyatlar boshqarmasi ma’lumot berdi.

Kecha, 17 yanvar kuni soat 17:43 da Sergeli tumanida transformator yonayotgani bo‘yicha shahar FVBga xabar kelib tushgan. Shunga ko‘ra, yong‘in joyiga birlamchi yong‘in-qutqaruv texnikalari soat 17:51 da yetib borgan va soat 17:58 da yong‘in to‘liq bartaraf etilgan. Yong‘in oqibatida transformatorning ichki qismi yonib zararlangan.

Shuningdek, kecha, 17 yanvar kuni Shayxontohur tumani, “Jarariq” mavzesida ham transformator yonib ketgan. Chaqiruvga ko‘ra, birlamchi yong‘in-qutqaruv texnikalari soat 18:55 da yong‘in bo‘layotgan joyga olib borilgan. 

Hudud elektr tarmoqlari xodimlari transformatorni elektr tizimidan uzganidan so‘ng soat 19:33 da yong‘in to‘liq bartaraf etilgan.

Eslatib o‘tamiz, joriy yilning 9 yanvar kuni Farg‘ona viloyati Qo‘shtepa tumanida transformator yonib ketgandi.