Toshkentdagi “dom”da gaz portladi (video)

Toshkent shahar Mirzo Ulug‘bek tumanidagi ko‘p qavatli uylardan birida gaz chaqnashi sodir bo‘ldi. Bu haqda Toshkent shahar Favqulodda vaziyatlar boshqarmasi xabar berdi.

Qayd etilishicha, bugun, 1 mart kuni soat 15:23 da Toshkent shahar FVBga Mirzo Ulug‘bek tumani Qorasuv 4 mavzesida joylashgan ko‘p qavatli uylarning biridagi xonadonda gaz chaqnashi sodir bo‘lgani to‘g‘risida xabar tushgan. Zudlik bilan aytilgan manzilga yong‘in-qutqaruv ekipajlari yetib borgan.

Bildirilishicha, voqea joyiga FVB, IIBB, SSB, prokuratura va boshqa tegishli tashkilotlar xodimlari ham chiqqan. Hozirda manzilda qutqaruv ishlari olib borilmoqda va 4 nafar fuqaro qutqarilgan, halok bo‘lganlar to‘g‘risida ma’lumot tushmagan.

Eslatib o‘tamiz, avvalroq Andijon viloyati Shahrixon tumanidagi gaz quyish shoxobchasida havo-gaz aralashmasining chaqnashi sodir bo‘lgan edi. Oqibatda avtomobillarga gaz quyish shoxobchasi hududida bo‘lgan 2 nafar fuqaro tan jarohati olgan. Ularga malakali tez tibbiy yordam ko‘rsatish maqsadida tuman tibbiyot birlashmasi Markaziy shifoxonasiga yotqizilgan.