Тошкентдаги “дом”да газ портлади (видео)

Тошкент шаҳар Мирзо Улуғбек туманидаги кўп қаватли уйлардан бирида газ чақнаши содир бўлди. Бу ҳақда Тошкент шаҳар Фавқулодда вазиятлар бошқармаси хабар берди.

Қайд этилишича, бугун, 1 март куни соат 15:23 да Тошкент шаҳар ФВБга Мирзо Улуғбек тумани Қорасув 4 мавзесида жойлашган кўп қаватли уйларнинг биридаги хонадонда газ чақнаши содир бўлгани тўғрисида хабар тушган. Зудлик билан айтилган манзилга ёнғин-қутқарув экипажлари етиб борган.

Билдирилишича, воқеа жойига ФВБ, ИИББ, ССБ, прокуратура ва бошқа тегишли ташкилотлар ходимлари ҳам чиққан. Ҳозирда манзилда қутқарув ишлари олиб борилмоқда ва 4 нафар фуқаро қутқарилган, ҳалок бўлганлар тўғрисида маълумот тушмаган.

Эслатиб ўтамиз, аввалроқ Андижон вилояти Шаҳрихон туманидаги газ қуйиш шохобчасида ҳаво-газ аралашмасининг чақнаши содир бўлган эди. Оқибатда автомобилларга газ қуйиш шохобчаси ҳудудида бўлган 2 нафар фуқаро тан жароҳати олган. Уларга малакали тез тиббий ёрдам кўрсатиш мақсадида туман тиббиёт бирлашмаси Марказий шифохонасига ётқизилган.