Toshkentda uy-joy masalasida eksperiment o‘tkaziladi

Normativ-huquqiy hujjatlar loyihalari muhokamasi portaliga “Toshkent shahrida uy-joy sharoitlarini yaxshilashga muhtoj bo‘lgan fuqarolarni hisobga olish va taqsimlash tizimini yanada takomillashtirish to‘g‘risida”gi Hukumat qarori loyihasi joylashtirildi.

Hujjat loyihasi bilan Toshkent shahrida ijtimoiy uy-joylarga murojaat qilish davlat xizmatini Yagona interaktiv davlat xizmatlari portali va Davlat xizmatlari markazlari orqali joriy qilish belgilanmoqda.

Ta’kidlanishicha, Toshkent shahrida ekcperiment tariqasida tadbiq etilayotgan ijtimoiy uy-joylarga murojaat qilish Davlat xizmatlari joriy etilishi tizimi o‘z samaradorligini ko‘rsatgan taqdirda, mamlakat bo‘ylab mazkur tizim 2021 yil 1 iyuldan boshlab tadbiq etiladi.

Qayd etilishicha, quyidagilar uy-joy sharoitlarini yaxshilash bo‘yicha davlat xizmatidan foydalanishlari mumkin:

•    turar joy maydoniga ega bo‘lmagan yoki yashash uchun yaroqsiz uy-joylar (baraklar, vaqtinchalik uylar, avariya holatidagi uylar, yerto‘lalar)da yashovchi fuqarolar;

•    har bir oila a’zosi o‘n olti kvadrat metrdan, kreslo-aravachada harakatlanadigan nogironlar uchun — yigirma uch kvadrat metrdan kam bo‘lgan turar joy bilan ta’minlanganlar;

•    yotoqxonalarda, ishlab chiqarish va xizmat xonalarida yashovchilar, bundan mavsumiy va vaqtinchalik xodimlar shuningdek, o‘qishlari sababli yotoqxonalarga ko‘chib o‘tgan fuqarolar mustasno;

•    qarindoshlik aloqalari bo‘lmagan ikki va undan ko‘p oila bo‘lib bir kvartirada yashovchilar;

•    uy-joy ajratilayotgan aholi punktida kamida uch yil doimiy ro‘yxatda turgan fuqarolar.