“Toshissiqquvvati” xodimi 27 mln so‘mni o‘zlashtirdi

Toshkent shahrida 27 mln so‘m mablag‘larni o‘zlashtirgan issiq suv xizmati texnik xodimi aniqlandi. Bu haqda O‘zbekiston Respublikasi Bosh prokuraturasi Matbuot xizmati xabar berdi.

Bosh prokuratura huzuridagi Departamentning Chilonzor tumani bo‘limi tomonidan “Toshissiqquvvati” DUK Chilonzor tumani bo‘limi murojaatiga asosan tergovga qadar tekshiruv o‘tkazilgan.

Tekshiruv natijasida shu bo‘limning texnik xodimi Z.M. 2018 yil davomida 58 nafar fuqarolar tomonidan isitish tizimi va issiq suv manbai uchun to‘langan pullarni iste’molchilarning shaxsiy hisob-raqamlariga tushirmasdan, ularga to‘lov kvitansiyalarini yozib berish orqali jami 27 mln. so‘m pul mablag‘larini firibgarlik yo‘li bilan qo‘lga kiritganligi aniqlangan.

Mazkur holat yuzasidan Z.M.ga nisbatan O‘zbekiston Respublikasi Jinoyat kodeksining tegishli moddasi bilan jinoyat ishi qo‘zg‘atilib, tergov harakatlari o‘tkazilmoqda.