Toshkentda shifokorning aybi bilan bemor vafot etgani aniqlandi

Ijtimoiy tarmoqlarda Toshkent shahri Uchtepa tumanidagi 3-sonli bolalar shifoxonasida shifokorlarning layoqatsizligi sababli bemor vafot etgani, muassasada tibbiy jihozlar va dori-darmonlar yetarli emasligi haqida xabarlar tarqaldi. Shahar Sog‘liqni saqlash bosh boshqarmasi mazkur holat yuzasidan rasmiy munosabat bildirdi. 

Qayd etilishicha, ushbu voqea joriy yilning yanvar oyida yuz bergan bo‘lib, huquq-tartibot idoralari tomonidan o‘rganilib, uning natijasi bo‘yicha javobgarlarga nisbatan tegishli choralar ko‘rilgan. Shifoxona moddiy-texnik bazasi esa bosqichma-bosqich yangilanmoqda. 

Xususan, shifoxonada 2023 yil uchun dori-darmon xaridiga 2 milliard 101 million so‘mdan ziyod mablag‘ ajratilgan. Taqqoslash uchun bu 2017 yilga nisbatan 3 barobar yuqori ko‘rsatkich hisoblanadi. 

“2022 yil yanvar oyida muassasaning “V” binosi jihozlangan holda  foydalanishga topshirilib, bemorlarga qulay shart-sharoitlar yaratilgan. Yordamchi  binoda qurilish-ta’mirlash va rekonstruksiya ishlari olib borilmoqda”, deyiladi xabarda. 

Eslatib o‘tamiz, avvalroq “Dunyo bo‘ylab” telekanalining 31 yoshli boshlovchisi Ramina Yagafarova Toshkent shahri Chilonzor tumanidagi xususiy klinikada vafot etgan edi. U joriy yilning 12 sentyabr kuni tutqanoq tutishi oqibatida hushini yo‘qotgan va birinchi yordamdan so‘ng o‘ziga kelgan. Biroq 13 sentyabr kuni unda ikkinchi tutqanoq kuzatilganidan keyin joni uzilgan.