Toshkentda lifti qulagan “dom”da yong‘in chiqdi (video)

Toshkent shahri Yangihayot tumanidagi “Yangi Darxon” MFYda joylashgan ko‘p qavatli uylardan birida yong‘in chiqdi. Bu haqda Favqulodda vaziyatlar vazirligi Matbuot xizmati xabar berdi.

Ma’lum qilinishicha, bugun, 19 iyun kuni soat 20:29 da poytaxtning Yangihayot tumani Navo ko‘chasida joylashgan ko‘p qavatli uylarning yuqori qavatlaridagi xonadonlarida yong‘in sodir bo‘lgani haqidagi xabar shahar Favqulodda vaziyatlar boshqarmasiga kelib tushgan.

Shunga ko‘ra 4 ta yong‘in-qutqaruv ekipaji va 2 ta avtonarvon soat 20:38 da voqea joyiga yetib borib, yong‘in soat 20:56 da o‘rab olingan va soat 20:59 da o‘chirilgan.

Yong‘indan 15-qavatdagi xonadonda 5 kvadrat/metr maydonda ko‘rpa yonib, zararlangan. Hodisa oqibatida tan jarohati olgan va halok bo‘lganlar yo‘qligi ma’lum qilingan. Hozirda yong‘in sababi va moddiy zarar miqdori aniqlanmoqda.

Eslatib o‘tamiz, joriy yilning 18 iyun kuni aynan shu mahallaning Navro‘z ko‘chasida joylashgan ko‘p qavatli uyning yuk tashish uchun mo‘ljallangan lifti pastga tushayotganda nosozlik sabab qulagan va oqibatda 11 kishi jarohatlangan edi.