Toshkentda 4 ta mashina to‘qnashdi

Toshkentning Yakkasaroy tumanida to‘rtta transport vositasi ishtirokida yo‘l-transport hodisasi sodir bo‘ldi. Bu haqda poytaxt IIBB xabar berdi.

YTH joriy yilning 6 oktyabr kuni taxminan soat 13:30 larda Yakkasaroy tumani hududidagi Kichik xalqa avtomobil yo‘lida yuz bergan. 2000 yilda tug‘ilgan K.X. boshqaruvidagi Nexia-3, 1987 yilda tug‘ilgan R.A. boshqaruvidagi Spark, 1993 yilda tug‘ilgan B.S. boshqaruvidagi Nexia-3 rusumli, 1980 yilda tug‘ilgan D.G. boshqaruvidagi JETOUR rusumli  mashinalar to‘qnashgan.

Dastlabki ma’lumotga ko‘ra YTHga 22 yashar haydovchi boshqaruvidagi Nexia-3 rusumli transport vositasi haydovchisi yo‘l harakati qoidalariga rioya etmasdan, yo‘lning qarama-qarshi qismiga chiqib harakatlangani sabab bo‘lgan.

Oqibatda to‘rtta avtomashina ishtirokidagi yo‘l-transport hodisasi sodir bo‘lgan.

To‘qnashuv natijasida Spark avtomashinasi haydovchisi, shuningdek yo‘lovchisi – voyaga yetmagan 2013 yilda tug‘ilgan J.J. tan jarohatlari olib, tibbiyot muassasasiga olib borilgan.

Mazkur holat yuzasidan Toshkent shahar IIBB YHXB tomonidan tergovga qadar tekshiruv o‘tkazilmoqda.