“Tolibon” Marshal Do‘stumning uyini yoqib yubordi

Olam

image

“Tolibon” jangarilari Afg‘oniston shimolidagi Juzjon provinsiyasi markazi Shibirg‘on shahriga bostirib kirdi. Janglar davom etmoqda. Bu haqda “Tolo News” nashri xabar berdi.

Qayd etilishicha, toliblar Afg‘onistondagi eng obro‘li shaxslardan biri asli o‘zbek Marshal Abdul Rashid Do‘stumning ushbu shaharda joylashgan uyini yoqib yuborgan.

O‘z navbatida, mahalliy amaldor “Sinxua” axborot agentligiga jangarilar shaharga kirgani hamda janglar davom etayotganini tasdiqlagan.

Eslatib o‘tamiz, Marshal Abdul Rashid Do‘stum joriy yilning 4 avgust kuni Ag‘onistonga qaytib kelgandi. U bunga qadar qandli diabet xastaligi tufayli koronavirusdan qiynalib, professional davolanishga ehtiyoj sezgan va shu tufayli Afg‘onistonni tark etgani aytilgandi. Bundan tashqari, OAVda Marshal Do‘stumning “Tolibon”ga qarshi janglarda yaralangani haqida xabarlar tarqalgandi.

Qayd etish kerakki, hozirda Afg‘onistonda hukumat kuchlari va “Tolibon” o‘rtasida harbiy harakatlar ketyapti. Kimning qo‘li baland kelishi borasida bir aniq bashorat berish qiyin. Chunki O‘zbekistonning janubiy qo‘shnisidan har kuni turli xil xabarlar kelmoqda. 

Bir safar toliblar Afg‘onistonning biror tumanini egallagani aytilsa, boshqa safar hukumat kuchlari harakat a’zolarining bir qancha jangarilarini yo‘q qilganini aytmoqda. Jumladan, Afg‘oniston Milliy mudofaa va xavfsizlik kuchlari bir sutkada “Tolibon” harakatining bir qancha jangarasini yo‘q qilgani haqida xabar bergan bo‘lsa, iyul oyi oxirida harakatning bir necha qo‘mondonlari hibsga olingani aytilgandi. Shu o‘rinda, mamlakatni tark etayotgan AQSHning urinishlarini esdan chiqarmaslik kerak. Amerika Havo kuchlari bir necha marta toliblarni havodan o‘qqa tutib, “Tolibon”ni faol harbiy harakatlar olib bormaslikka chaqirdi.

Faollashgan “Tolibon” va Afg‘onistondagi keskinlik

Afg‘onistondagi xavfsizlik bilan bog‘liq vaziyat joriy yilning aprelida AQSH Prezidenti Jo Baydenning respublikada Amerika qurolli kuchlarining operatsiyasi yakuniga yetganini e’lon qilganidan so‘ng, ancha yomonlashdi. 

Joriy yilning 13 iyul holatiga ko‘ra, Qo‘shma Shtatlar o‘z qo‘shinlarining 95 foizidan ko‘prog‘ini Afg‘onistondan olib chiqib ketib bo‘ldi. Bu jarayon 31 avgustga qadar yakunlanishi kutilmoqda. Shtatlar kabi NATOning boshqa a’zolari ham Afg‘onistonni tark etmoqda. Jumladan, ItaliyaAvstraliya va Germaniya kuchlari, allaqachon, mamlakatdan chiqib ketgan.

Xorijiy qo‘shinlarning Afg‘onistonni tark etishi fonida “Tolibon” harakati mamlakat hududlari ustidan nazoratni o‘rnatish maqsadida hujumlarni kuchaytirmoqda. Toliblarning ta’kidlashicha, ular ayni paytda Afg‘onistonning 85 foizini nazorat qilmoqda. Bundan tashqari, harakat kuchlari bir qator qo‘shni davlatlar — Turkmaniston, Tojikiston, Eron va Pokiston bilan chegarada joylashgan nazorat punktlarini ham egallab olgan. Shunday bo‘lsa-da, harakat vakillari Afg‘onistondan tashqariga chiqmasliklarini va qo‘shni davlatlarga xavf solmasliklarini qayta va qayta ta’kidlamoqda.


Maqola muallifi

Teglar

Baholaganlar

1272

Reyting

3

Maqolaga baho bering

Doʻstlaringiz bilan ulashing