“Time” yil sportchisini aniqladi

AQSHning “Time” jurnali “Los-Anjeles Leykers” forvardi Lebron Jeymsni “Yilning eng yaxshi sportchisi” deb topdi. 

Ta’kidlanganidek, 2020 yilda 35 yoshli sportchi Kaliforniya jamoasini 17-marta Milliy basketbol assotsiatsiyasi chempionligiga olib chiqqan. 

Bundan tashqari, jurnalistlar Jeymsning faol fuqarolik pozitsiyasini alohida ta’kidlagan. Basketbolchi AQSHdagi irqiy tengsizlikka qarshi kurashgan va amerikaliklarni joriy yil 3 noyabrda o‘tkazilgan prezidentlik saylovlarida saylov uchastkalariga jalb qilgan. 

Nashrga ko‘ra, Jeyms joriy yilda unga hech kim teng kela olmasligini isbotlagan.
 
Ma’lumot uchun, Jeyms joriy yilning oktyabr oyida Milliy basketbol assotsiatsiyasi pley-off bosqichi final seriyasining eng qimmat o‘yinchisi deb topilgan. U assotsiatsiyaning to‘rt karra chempioni. To‘rtinchi marotaba basketbolchi final seriyada eng qimmat o‘yinchi sovrinini qo‘lga kiritdi va tarixda uch xil jamoa bilan ushbu sovrinni olgan birinchi basketbolchi bo‘ldi.

Shuningdek, “Time” AQSH Prezidenti va vitse-prezidenti sifatida saylangan Jo Bayden va Kamola Xarrisni "Yil odami-2020" deb topdi. 

Avvalroq, “Time” jurnali o‘z tarixida ilk bor “Yil bolasi” nominatsiyasini e’lon qilgani haqida ma’lum qilgan edik. 

Shuningdek, nashr 2020 yilni hozirgi avlod uchun dunyo tarixidagi eng yomon yil deb e’lon qildi.