Teylor Svift sayyoradagi eng nufuzli ayollar beshligidan joy oldi

Amerikalik qo‘shiqchi Teylor Svift dunyoning eng nufuzli ayollari beshligidan o‘rin egallagan birinchi qo‘shiqchi deb topildi. “Forbes” jurnali o‘z reytingida 33 yoshli xonandani mashhur ayol siyosatchilardan keyin beshinchi o‘ringa loyiq ko‘rdi.

Teylor Sviftning 1,1 milliard dollarlik boyligi va barcha rekordlarni yangilagan gastrol safarlari qo‘shiqchiga mazkur reytingdan joy olishiga yordam berdi.

Joriy yilda bo‘lib o‘tgan “Eras tour” gastrolida Sviftning retrospektivi va o‘ninchi albomi dunyo yuzini ko‘rdi. Bu yirik moliyaviy hodisaga ham aylandi, chunki gastrol ijrochiga chiptalar sotuvidan 780 million dollardan ko‘proq daromad keltirdi va ancha yillardan beri eng daromadli safar deb topildi.

Bundan tashqari, Teylor Svifting “Eras tour” nomli hujjatli filmi ijodkorga butun dunyo bo‘ylab 200 million dollardan ortiq foyda keltirgan.

Qayd etilishicha, Taylor Sviftning konsertlari ular o‘tkaziladigan mamlakatda inflyatsiyani vujudga keltirgan ham bo‘lishi mumkin. “Moody’s”ekspertlari qo‘shiqchining tashrifi bilan davlatlarda iqtisodiy dinamika tezlashgani, bar va restoranlarda tushumlar o‘sib borgani, taksi xizmatlari va jamoat transportlariga talab ortganini qayd etgan.

Aytish joizki, o‘tgan yili Teylor xuddi shu ro‘yxatda 79-o‘rinni egallagan. Bu yilgi reytingda esa boshqa mashhur san’atkorlar, xususan, Beyonse 36-o‘rin, Rianna esa 74-o‘rindan joy olgan.

Ma’lumot uchun, bu yilgi dunyodagi eng nufuzli ayoli sifatida reytingda Yevrokomissiya rahbari Ursula fon der Lyayen keltirilgan. Uning qarorlari Yevropadagi 450 million kishiga ta’sir qilishi aytilgan. Ikkinchi o‘rinda Yevropa Markaziy banki prezidenti Kristin Lagard, keyingi o‘rinlarda esa AQSH vitse-prezidenti Kamala Xarris va Italiya bosh vaziri Giorgia Melonilar o‘rin egallagan. Ilgari bu mamlakatlarda ayollar bunday yuqori lavozimlardan joy olmagan.

Eslatib o‘tamiz, Joriy yilning iyul oyida Teylor Sviftning Siyetldagi ikkita konserti o‘sha hududda 2,3 balli zilzilalarga sabab bo‘lgan edi.