Temiryo‘llardagi “stop” belgilari boshqariluvchi svetoforlarga almashtiriladi

O‘zbekistondagi ayrim temiryo‘llarda yuzaga kelayotgan uzun tirbandliklarning oldini olish maqsadida temiryo‘l kesishmalarida “stop” belgilari boshqariluvchi svetoforlarga almashtirilishi belgilandi. Bu Prezident topshirig‘iga asosan qabul qilingan hukumat qarorida belgilangan.

Xabarda bugungi kunda yo‘llardan kesib o‘tuvchi ayrim temiryo‘llarda hafta yoki kun davomida vagonlar harakatlanmasa -da, haydovchilar belgi oldida to‘xtashga majbur bo‘layotgani va oqibatda uzun tirbandliklar yuzaga kelayotgani aytilgan. Shu munosabat bilan avtomobil yo‘llarida harakatlanish tartibini yanada takomillashtirish, haydovchilarga qo‘shimcha qulayliklar yaratish hamda ularni qiynab kelayotgan muammolarni bartaraf etishga qaratilgan Hukumat qarorida avtomobil yo‘llaridan o‘tgan ayrim temiryo‘l kesishmalarida “stop” belgilari boshqariluvchi svetoforlarga almashtirilishi belgilandi.

Masalan, Toshkent shahrining Farg‘ona yo‘li ko‘chasi (ko‘prik oldida), Cho‘ponota va Shota Rustaveli ko‘chalari kesishmasi, Kichik halqa yo‘li (Qushbegi) singari yirik yo‘llarda zarurat bo‘lmasa-da, haydovchilar to‘xtashga majbur. 

Eslatib o‘tamiz, mazkur qaror bilan joriy yil 1 iyundan boshlab yo‘l chiziqlarini bosib qoidabuzarlik sodir etish holatlarini maxsus avtomatlashtirilgan foto va video qayd etish dasturiy-texnik vositalari orqali qayd etishga yo‘l qo‘yilmasligi belgilangandi. To‘xtash chizig‘i – “stop-liniya” (5.33 yo‘l belgisi) bundan mustasno.

Qarorga ko‘ra, 1 iyundan boshlab shaharlar avtomobil yo‘llarida ta’mirlash yoki yo‘l chiziqlarini chizish bilan bog‘liq ishlarni soat 07:00 dan 21:00 ga qadar amalga oshirishga (dam olish kunlari, shuningdek, kechiktirib bo‘lmaydigan alohida holatlar bundan mustasno) yo‘l qo‘yilmaydi.

Shuningdek, joriy yil 1 sentyabrdan boshlab harakat tezligini nazorat qilishga mo‘ljallangan har qanday turdagi statsionar va mobil radarlar joylashgan hududda va ungacha kamida 250 metrdan kam hamda 500 metrdan ko‘p bo‘lmagan hududda “Radar” yo‘l belgisining o‘rnatilishi majburiy bo‘ladi.

Bundan tashqari, avtobuslar harakati uchun ajratilgan, ya’ni “A” harfli tasmalarda boshqa transport vositalarining soat 23:00 dan 06:00 ga qadar harakatlanishi qoidabuzarlik hisoblanmaydi. 

Shu bilan birga, endilikda “To‘xtash taqiqlangan” va “To‘xtab turish taqiqlangan” yo‘l belgilarining amal qilish vaqtini ko‘rsatuvchi qo‘shimcha axborot belgilari o‘rnatiladi.