Tayvan yaqinida Rossiya harbiy kemasi kuzatildi 

Tayvan Mudofaa vazirligi Rossiya harbiy-dengiz kuchlarining ikkita kemasi orolning sharqiy qirg‘oqlari bo‘ylab o‘tganini qayd etdi. Bu haqda bugun, 28 iyun kuni e’lon qilingan bayonotda aytildi.

"27 iyun kuni soat 23:00da Rossiyaga tegishli ikkita  fregat kuzatildi. Ular bizning sharqiy suvlarimiz orqali janubdan shimolga o‘tib, Suao portining janubi-sharqidagi ochiq okeanga tushib ketdi", deyiladi hujjatda.

Qayd etilishicha, Tayvan qurolli kuchlari Rossiya fregatlarining harakatini kuzatgan, buning uchun samolyotlar, kemalar va qirg‘oq raketa tizimlari jalb qilingan.

Rossiyaning Tinch okean floti matbuot xizmati esa “Gromkiy” va “Sovershenniiy” korvetlari Janubiy Xitoy dengizini kesib o‘tib, Filippin dengizining janubiy qismiga kirganini xabar qilgan.  Kemalar Osiyo-Tinch okeani mintaqasida Rossiya dengiz kuchlarining mavjudligini namoyish qilish uchun manyovrlarni amalga oshiradi.

Eslatib o‘tamiz, oldinroq Xitoyning 37 ta harbiy samolyoti hamTayvan orolining havo mudofaa zonasiga kirgandi.