Tabiiy gaz va elektr energiyasi narxi oshadimi?

2023 yilda O‘zbekistonda aholi uchun tabiiy gaz va elektr energiyasi narxlarini oshirish ayni paytda rejalashtirilmagan. Bu haqda AOKAdagi matbuot anjumanida Iqtisodiyot va moliya vaziri o‘rinbosari Dilshod Sultonov ma’lum qildi.

Narxlar oshadimi yo‘qmi, aniq ayta olmayman. Katta ehtimol bilan oshmaydi —aholi (jismoniy shaxslar — tahr.) uchun aniq oshmaydi. Lekin bu mazkur masalani muhokama qilmayapmiz, degani emas. Turli variantlarni ko‘rib chiqyapmiz, jumladan, qandaydir ijtimoiy normalar muhokama qilinyapti”, deydi vazir o‘rinbosari.

Uning fikricha, gaz va elektr energiyasini ko‘p iste’mol qiladigan, sovuq qishda uyda futbolkada yuradigan boy odamlar bozor narxida to‘lashi kerak.

“Bu adolatdan bo‘ladi. Agar fuqaro ijtimoiy ro‘yxatlardan birida tursa, maoshi kam bo‘lsa, ikki xonali kvartirada yashasa, elektr energiyasi va gazdan tejamkorlik bilan foydalansa, bunday odamlarni rag‘batlantirish kerak. Bunday tariflar aksariyat mamlakatlarda amal qiladi. Biz bunga bir kun yetib boramiz”, deya qo‘shimcha qildi Sultonov.