Suyunchi! Andijonda 5 nafar egizak dunyoga keldi

Bugun, 6 iyul kuni Andijon shahar 2-son tug‘uruq majmuasida 5 nafar egizak dunyoga keldi. Bu haqda Sog‘liqni saqlash vazirligi matbuot kotibi Furqat Sanayev ma’lum qildi.

Uning bildirishicha, Andijon shahridagi “Qayrag‘ochtosh” mahalla fuqarolar yig‘inida istiqomat qiluvchi Nargiza Bekjonova bugun, 6 iyul kuni ko‘p homilalik tashxisi bilan 2-son tug‘uruq muassasasiga qabul qilingan.

Unda muddatidan ilgari tug‘uruq tashxisi bilan kesarcha kesish amaliyoti bajarilgan. Tug‘uruq jarayoni malakali akusher-ginekolog, neonatolog va reanimatologlar tomonidan muvaffaqiyatli o‘tkazilgan.

Ma’lum bo‘lishicha:

• birinchi chaqaloq: qiz, vazni 1450 gr;
• ikkinchi chaqaloq: o‘g‘il, vazni 1605 gr;
• uchinchi chaqaloq: qiz, vazni 1495 gr;
• to‘rtinchi chaqaloq: o‘g‘il, vazni 1585 gr;
• beshinchi chaqaloq: qiz, vazni 1205 gr.

Ixtisoslashtirilgan tibbiy xizmat ko‘rsatish maqsadida ona va chaqaloqlar Respublika ixtisoslashtirilgan ona va bola salomatligi ilmiy-amaliy tibbiyot markazi Andijon viloyati filialiga o‘tkazilgan.

Bildirilishicha, ayni paytda 5 nafar egizak va ularning onasi malakali tibbiyot xodimlari nazoratida o‘zlarini yaxshi his etmoqda.

Eslatib o‘tamiz, avvalroq Toshkent viloyati Ichki ishlar bosh boshqarmasi xodimining oilasida 4 nafar egizak farzand dunyoga kelgandi.