Sun’iy intellektdan harbiy sohada foydalanish taklif qilindi

Janubiy Koreya poytaxti Seulda bo‘lib o‘tgan “Harbiy sohada sun’iy intellektdan mas’uliyatli foydalanish” (REAIM) global sammitida sun’iy intellekt texnologiyalarini harbiy qo‘llash bo‘yicha yo‘l xaritasi taqdim etildi. Bu haqda “Reuters” xabar berdi.

Nashrga ko‘ra, taqdim etilgan hujjat qonuniy kuchga ega emas. Lekin 2023 yil Amsterdamda bo‘lib o‘tgan REAIM sammitida qabul qilingan rejadan ko‘ra “ko‘proq harakatga chaqiriq” sifatida qayd etilgan. Shuningdek, ba’zi kuchlar, jumladan, terroristik guruhlarning sun’iy intellektdan ommaviy qirg‘in qurollarini ko‘paytirish uchun foydalanishiga yo‘l qo‘ymaslik zarurligi, shuningdek, ushbu texnologiya ustidan inson nazoratini saqlab qolish muhimligi ma’lum qilingan.

Qayd etilishicha, Janubiy Koreya sammitida sun’iy intellektdan foydalanish xavfini muhokama qilishda olg‘a siljish bor. Shuningdek, yangi ishlanmalar, jumladan, Ukraina dronlarini ushbu texnologiya bilan jihozlash rejalashtirilgan.

“Biz yana aniq qadamlar tashlayapmiz. O‘tgan yilgi REAIM sammiti ko‘proq o‘zaro bir-birimizni tushunishga qaratilgan edi, endi esa harakatga o‘tyapmiz”, deydi Niderlandiya Mudofaa vaziri Ruben Brekelmans.

Nashrning yozishicha, tadbirda ishtirok etgan 96 davlatdan nechtasi rejaning qabul qilinishini qo‘llab-quvvatlagani noma’lumligicha qolmoqda. Biroq ulardan 60 ga yaqin davlat mudofaada sun’iy intellektdan foydalanish bo‘yicha “harakatga chaqiruv” bo‘ladigan, ammo majburiy bo‘lmagan hujjat ishlab chiqishni avvalroq ma’qullagan.

Eslatib o‘tamiz, avvalroq Rossiya Tashqi razvedka xizmati direktori Sergey Narishkin AQSH razvedka agentliklari sun’iy intellektdan uni qo‘llovchi davlatlarga qarshi vosita sifatida foydalanishini aytgandi.