Stoltenberg Erdo‘g‘an bilan gaplashib oldi

NATO Bosh kotibi Yens Stoltenberg Turkiya Prezidenti Rajab Toyib Erdo‘g‘an bilan Finlyandiya va Shvetsiyaning alyansga a’zolik arizalarini muhokama qildi. Bu haqda RIA Novosti xabar berdi.

“Qimmatli ittifoqdoshimiz Turkiya Prezidenti Erdo‘g‘an bilan alyansning ochiq eshiklar siyosatining ahamiyatini, shuningdek Finlyandiya va Shvetsiyaning a’zolik arizalarini muhokama qildik Biz ittifoqning barcha a’zolarining xavfsizlik bilan bog‘liq xavotirlarini hisobga olish va yechim topish uchun muzokaralarni davom ettirish zarurligiga kelishib oldik”, deb yozib qoldirgan Stoltenberg Twitter’dagi sahifasida.

Finlyandiya va Shvetsiyaning NATOga intilishlari

Rossiyaning Ukrainaga qarshi urush boshlashi ortidan uzoq yillar davomida betaraflik maqomida bo‘lib kelgan Finlyandiya va Shvetsiya NATOga qo‘shilish harakatiga tushdi. 

Joriy yilning 12 may kuni Finlyandiya Prezidenti va Bosh vaziri mamlakat NATOga qo‘shilishini qo‘llab-quvvatlashi ma’lum bo‘ldi. NATO ham bu davlatni ortiqcha jarayonlarsiz tashkilotga olishga tayyorligi bildirildi.

Buning ortidan rasmiy Moskva Finlyandiya NATOga qo‘shilsa, Rossiya javob choralarini ko‘rishga majbur bo‘lishini e’lon qildi. Xususan, Rossiya o‘z milliy xavfsizligiga bu borada yuzaga keladigan tahdidlarni to‘xtatish uchun ham harbiy-texnik, ham boshqa xarakterdagi javob choralarini ko‘rishi aytildi.

11 may kuni esa Buyuk Britaniya Bosh vaziri Boris Jonson ikkala davlatga tashrif buyurib, Shvetsiya va Finlyandiya rahbarlari bilan o‘zaro xavfsizlik kafolatlarini imzoladi.

13 may kuni esa NATO a’zosi bo‘lgan Turkiya Prezidenti Rajab Toyib Erdo‘g‘an Finlyandiya va Shvetsiyaning NATOga a’zo bo‘lishiga ijobiy qaramasligini bildirdi. Bunga ikki davlat Turkiya terrorchi deb tan PKK'ni ko‘llab-quvvatlashi sabab qilib ko‘rsatildi.

18 may kuni Finlyandiya va Shvetsiya rasman NATOga a’zo bo‘lish uchun ariza topshirdi. Erdo‘g‘an esa Turkiya ushbu ikki davlatning NATOga kirishiga yo‘l qo‘yib, Gretsiya bilan yo‘l qo‘ygan xatosini takrorlamasligini aytdi.