Starlink sun’iy yo‘ldosh orbitasini pasaytirmoqchi

Starlink 2026 yilda Yer orbitasida taxminan 550 km balandlikda harakatlanayotgan barcha sun’iy yo‘ldoshlarini 480 kilometrgacha tushirish orqali turkumini qayta konfiguratsiya qiladi. Bu haqda SpaceX kompaniyasining Starlink muhandislik bo‘yicha vitse-prezidenti Maykl Nikolsga tayanib, “Reuters” xabar berdi.

Qayd etilishicha, kompaniya sun’iy yo‘ldoshlarning orbitasini pasaytirish orqali kosmik xavfsizlikni oshirishni maqsad qilmoqda. Bu qaror Starlink dekabr oyida sun’iy yo‘ldoshlaridan birining kosmosda anomaliyaga uchrashi, oqibatda oz miqdorda qoldiqlar paydo bo‘lishi va 418 km balandlikda kosmik kemalar bilan aloqa uzilishi haqida xabarlar paydo bo‘lganidan so‘ng qabul qilindi. Ushbu hodisa Starlink uchun orbitada kam uchraydigan kinetik avariya bo‘lgan.

Kompaniyaning ma’lum qilishicha, ushbu sun’iy yo‘ldosh tezda to‘rt kilometr balandlikka qulagan, bu esa bortda biror portlash sodir bo‘lganini ko‘rsatadi.

“Sun’iy yo‘ldoshlarni tushirish Starlink orbitalarining zichlashishiga olib keladi va kosmik xavfsizlikni bir necha jihatdan oshiradi. 500 kilometrdan past balandlikda qoldiq ob’ektlar va rejalashtirilgan sun’iy yo‘ldosh yulduz turkumlari soni sezilarli darajada kamayadi, bu esa to‘qnashuv ehtimolini kamaytiradi”, deydi Nikols.

So‘nggi yillarda kompaniyalar va davlatlar internet yulduz turkumlari, aloqa va Yer tasvirlari kabi kosmik xizmatlar uchun o‘n minglab sun’iy yo‘ldoshlarni joylashtirishga shoshilmoqda, natijada Yer orbitasidagi kosmik kemalar soni keskin oshgan.

Raketa uchirish biznesida uzoq yillik tajribaga ega bo‘lgan SpaceX iste’molchilar, hukumatlar va korporativ mijozlarga keng polosali internet uzatuvchi 10 000 ta sun’iy yo‘ldoshdan iborat Starlink tarmog‘i orqali dunyodagi eng yirik sun’iy yo‘ldosh operatoriga aylandi.