SSSRni qo‘msagan KXSHT. Qirg‘izistonda harbiy mashg‘ulotlar boshlandi

Qirg‘izistonning Issiqko‘l viloyatida Kollektiv xavfsizlik shartnomasi tashkilotiga a’zo davlatlar tinchlikparvar kuchlarining “Buzilmas birodarlik – 2023” qo‘shma mashg‘ulotlari boshlandi. Bu haqda Qirg‘iziston Mudofaa vazirligi matbuot xizmati xabar berdi. 

“Bugun Qirg‘iziston Respublikasida “Edelveys” poligonida KXSHT tinchlikparvar kuchlari bilan “Buzilmas birodarlik – 2023” qo‘shma mashg‘ulotlarining faol bosqichini ochishga bag‘ishlangan tantanali marosim bo‘lib o‘tdi”, deyiladi xabarda. 

Qayd etilishicha, o‘quv mashg‘ulotlarining asosiy maqsadlari KXSHT tinchlikparvar bo‘linmalari boshqaruv organlari va shaxsiy tarkibining amaliy ko‘nikmalarini oshirishdan iborat. Bundan tashqari, tadbirlar harbiy qism va bo‘linmalarning o‘zaro hamjihatligini oshirishga qaratilgan. 

“Baland tog‘li sharoitda o‘tkaziladigan mashg‘ulotlar davomida inqiroz zonasida mojarodan keyingi vaziyatni hal etish bo‘yicha vazifalar – KXSHT kollektiv xavfsizlik tizimi kuchlari va vositalaridan foydalangan holda tinchlikparvar operatsiya o‘tkazish va insonparvarlik yordami ko‘rsatish bo‘yicha amaliy ishlar amalga oshiriladi”, deyiladi xabarda. 

Mashg‘ulotlarga Rossiya, Belarus, Qozog‘iston, Qirg‘iziston va Tojikistondan 1,5 mingga yaqin tinchlikparvar qo‘shinlari, Birlashgan shtab va KXSHT Kotibiyatining tezkor guruhlari jalb etilgan. Shuningdek, 200 dan ortiq maxsus, zirhli va avtomobil texnikasi, harbiy transport, qiruvchi va armiya samolyotlari, uchuvchisiz samolyotlar va jangovar katerlar ishtirok etmoqda. 

Chorak asrlik tajriba

KXSHT Birlashgan shtabi boshlig‘i Anatoliy Sidorov KXSHTga a’zo davlatlar dunyoning turli burchaklarida tinchlikni saqlash bo‘yicha 25 yildan ortiq tajribaga ega ekanligini ta’kidladi. 2022 yilda Qozog‘istonda KXSHT tinchlikparvar kuchlari amalda qo‘llanila boshlandi. Tinchlikni saqlash amaliyoti natijasi respublikaning o‘zi, shuningdek, tashkilot mamlakatlari rahbariyati tomonidan yuqori baholandi. 

Uning so‘zlariga ko‘ra, KXSHT tinchlikparvar kuchlarini takomillashtirishda davom etadi. Bu kelgusi yillarda tashkilotning jamoaviy xavfsizlik tizimini rivojlantirishning eng muhim yo‘nalishidir. 

Shuningdek, Sidorov mashg‘ulotlarda Ivan Panfilov nomidagi 8-gvardiya motoo‘qchilar diviziyasi bo‘linmalari ishtirok etayotganini eslatdi. U 1941 yilda Qirg‘iziston va Qozog‘iston SSRda tashkil topgan bo‘lib, ayniqsa, Moskva yaqinidagi janglarda o‘zini namoyon qilgan.

“Harbiy an’analarni asrab-avaylash, o‘tmishdoshlar xotirasini e’zozlash barchamiz, xalqlarimiz so‘zda emas, amalda yagona jangovar tuzilmada turib, birga turganligimizning eng yorqin namunasidir”, deydi u. 

Qirg‘iziston mudofaa vaziri o‘rinbosari Ruslan Mukambetov ochilish marosimida aytishicha, , joriy mashg‘ulotlar “ruhiy rivojlanayotgan global vaziyatning voqeligini hisobga olgan holda” o‘tkazilmoqda.

KXSHT qanday tashkilot?

KXSHTning vazifasi qo‘shin va yordamchi bo‘linmalarning birgalikdagi sa’y-harakatlari bilan shartnomada ishtirok etadigan mamlakatlarning hududiy-iqtisodiy makonini har qanday tashqi harbiy va siyosiy tajovuzkorlardan, xalqaro terrorchilardan, shuningdek keng ko‘lamli tabiiy ofatlardan himoya qilishdan iborat. Bugungi kunda ushbu tashkilotga 6 davlat: Rossiya, Belarus, Armaniston, Tojikiston, Qozog‘iston va Qirg‘iziston a’zo.