Slovakiyada muxolifat Fitso kabinetiga ishonchsizlik votumi tayyorlamoqda

Slovakiyadagi muxolifat kuchlari yaqin kelajakda Bosh vazir Robert Fitso hukumatiga ishonchsizlik votumi o‘tkazish niyatida. Bu haqda bugun, 14 yanvar kuni bo‘lib o‘tgan qo‘shma matbuot anjumanida “Progressiv Slovakiya”, “Ozodlik va birdamlik”, “Xristian-demokratlar”, “Slovakiya”, “Xalq uchun” va “Xristian ittifoqi” partiyalari vakillari ma’lum qildi.

“Robert Fitso Slovakiyani tashlab ketdi. Uyda bo‘lib, odamlarni tashvishga solayotgan muammolarni hal qilish o‘rniga, u dunyo bo‘ylab sayohat qiladi, diktatorlarga ta’zim qiladi, qayerdadir dabdabadan zavqlanadi. U qo‘shnilarimiz va hamkorlarimizni haqorat qiladi. Biz Fitsoning Slovakiyani sharqqa burishiga yo‘l qo‘ymaymiz”, degan “Progressiv Slovakiya” partiyasi rahbari Mixal Shimechka.

U Fitsoning 14 yillik davri davomida mamlakat katta zarar ko‘rgani, ularni 10 soat ichida ham sanab bo‘lmasligini aytgan.

“Reuters”ning yozishicha, Fitso kabinetiga ishonch masalasi parlamentda qachon ovozga qo‘yilishi hozircha noma’lum. Hukumatga impichment e’lon qilish uchun muxolifat parlament a’zolarining ko‘pchiligini ta’minlashi kerak. Hozirda Slovakiya parlamentidagi hukmron koalitsiyani 150 deputatdan 76 nafari qo‘llab-quvvatlamoqda.

2024 yil dekabr oyining oxirida Fitso Moskvaga tashrif buyurdi va u yerda Rossiya Prezidenti Vladimir Putin bilan uchrashdi. Shundan so‘ng, Fitso qish sharoitida va Rossiya Federatsiyasining energiya infratuzilmasiga davom etayotgan hujumlari fonida Ukrainaga elektr energiyasini yetkazib berishni cheklash bilan tahdid qildi. Bunga javoban Ukraina Prezidenti Vladimir Zelenskiy Putin Fitsoga “Slovakiya xalqi manfaatlari evaziga Ukrainaga qarshi ikkinchi energetika jabhasini ochish” haqida “ko‘rsatma berishini” taklif qildi. Zelenskiyning eslatishicha, Fitso 1 yanvardan Rossiyadan gaz tranzitini to‘xtatgani uchun Kiyev taklif qilgan tovon pulidan bosh tortgan.

“Endi u Slovakiya xalqini yiliga kamida 200 million dollarsiz qoldirishi mumkin”, deb yozgan Ukraina Prezidenti dekabr oyining oxirida ijtimoiy tarmoqlarda.

11 yanvar kuni Slovakiya Bosh vaziri “Yevropa bo‘ylab yuradigan, shunchaki tilanchilik qiladigan va shantaj qiladigan, boshqalardan pul so‘raydigan” Ukraina Prezidentidan “to‘yganini” aytdi.

“Bu shunchaki to‘xtatilishi kerak”, degan Robert Fitso muxolifat tashabbusi bilan bo‘lib o‘tgan parlament qo‘mitasi yig‘ilishida.

Muxolifatchilar undan Moskvaga safari, shuningdek, Slovakiyaning Rossiya gazining Ukraina orqali tranzitini to‘xtatishi munosabati bilan keyingi qadamlari haqida tushuntirishni talab qildi.

Eslatib o‘tamiz, 2025 yilning 1 yanvar kunidan e’tiboran “Gazprom” Ukraina orqali gaz yetkazib berishni to‘xtatgandi. Slovakiya Bosh vaziri Robert Fitso Rossiya gazining Ukraina orqali tranzitini to‘xtatishni Vladimir Zelenskiy tomonidan uyushtirilgan “sabotaj” deb atadi va ukrainalik qochqinlarga yordamni kamaytirish bilan tahdid qildi.