Shohasan Mirzamatovning raqibi ma’lum bo‘ldi 

Yarim o‘rta vazn toifasida o‘zbekistonlik MMA'chi Shohasan Mirzamatov navbatdagi jangini 22 iyul kuni Octagon 47 musobaqasida o‘tkazadi. Bu haqda promoushenning matbuot xizmati xabar berdi.

Manbaga ko‘ra, mazkur bahs Qozog‘istonning Olmaota shahrida joylashgan “Baluan-Sholak” arenasida tashkil etiladi. O‘sha kuni Mirzamatovga eronlik Akbar Azadi-Far raqiblik qiladi.

Ma’lumot uchun, O‘zbekiston vakili faoliyati davomida 11 ta jangda qatnashib, ularning 9 tasida qo‘li baland kelgan va 2 marta raqiblariga imkoniyatni boy bergan. U oxirgi jangini 2022 yilning may oyida MPL 5 turniri doirasida qirg‘izistonlik Edil Esengulovga qarshi o‘tkazib, mag‘lubiyatga uchragan. 

Uning eronlik raqibi Azadi-Far uchun bu Octagon ligasidagi dastlabki jang bo‘ladi. 41 yoshli sportchi so‘nggi jangini 2021 yil 4 fevral kuni debyutant Orxan Abbasovga qarshi o‘tkazib, g‘alaba qozongan. U bunga qadar 4 ta professional jangida zafar quchgan.