Shimoliy Koreyada kulish taqiqlandi

Shimoliy koreyaliklarga sobiq Prezident Kim Chen Ir vafotining 10 yilligi munosabati bilan 11 kun davomida kulish va spirtli ichimlik ichish taqiqlandi. Bu haqda “Daily Mail” nashri yozmoqda.

Qayd etilishicha, hukumat rasmiylari Shimoliy Koreyada sobiq Prezidentning o‘limini xotirlash paytida jamoatchilikka hech qanday baxt belgisini ko‘rsatmaslikni buyurgan.

Qayd etish joizki, Kim Chen Ir Shimoliy Koreyani 1994 yildan 2011 yilgacha (vafotigacha) boshqargan, so‘ngra uning o‘rniga uchinchi va kenja o‘g‘li, hozirgi yetakchi Kim Chen In kelgan.

Endilikda, uning o‘limidan o‘n yil o‘tib, shimoliy koreyaliklar 11 kunlik motam e’lon qilishga majbur bo‘lib,  ularga kulish va spirtli ichimliklar ichish taqiqlangan.

Manbaning qo‘shimcha qilishicha, shimoliy koreyaliklarga 17 dekabr Kim Chen Ir vafotining 10 yilligi munosabati bilan oziq-ovqat xarid qilish ham taqiqlangan.

“O‘tmishda motam paytida mast holda ushlangan ko‘plab odamlar hibsga olinib, mafkuraviy jinoyatchilar sifatida qaralgan. Ularni olib ketishgan va ularni boshqa hech qachon ko‘rmaganmiz”, deydi fuqarolardan biri. 

Ma’lum qilinishicha, motam paytida fuqarolarning oila a’zolaridan biri vafot etgan taqdirda ham baland ovozda yig‘lashga ruxsat berilmaydi. Faqatgina motam tugaganidan keyin jasadni olib chiqish mumkin. Odamlar motam tutsalar, o‘zlarining tug‘ilgan kunlarini ham nishonlay olmaydilar.

Ma’lumot uchun, Kim Chen Ir 2011 yilning 17 dekabrida 69 yoshida yurak xurujidan vafot etgan. Mamlakatni 17 yil davomida shafqatsiz va repressiv diktatura ostida boshqargan.

Kim Chen Ir uchun yillik motam odatda 10 kunni tashkil qiladi, ammo bu yil uning vafotining o‘n yilligini nishonlash uchun motam 11 kunga cho‘ziladi.