Shavkat Mirziyoyev BMT Bosh kotibi o‘rinbosarini qabul qildi

Jamiyat

image

O‘zbekiston Respublikasi Prezidenti Shavkat Mirziyoyev bugun, 14 sentyabr kuni SHHTning Samarqand sammitida ishtirok etish uchun mamlakatga kelgan BMT Bosh kotibining siyosiy masalalar va tinchlikni barpo etish bo‘yicha o‘rinbosari Rozmari DiKarloni qabul qildi.

O‘zbekiston va BMT o‘rtasidagi amaliy hamkorlikning istiqbolli yo‘nalishlari, dolzarb xalqaro masalalar, mamlakatda 2030 yilga qadar Barqaror rivojlanish maqsadlariga erishish borasidagi ishlar yuzasidan batafsil fikr almashildi.

Rozmari DiKarlo Prezident Shavkat Mirziyoyevga samimiy qabul uchun minnatdorlik bildirdi. BMT Bosh kotibi Antoniu Guterrishning salomini yetkazib, u 2022-2026 yillarda Yangi O‘zbekistonni rivojlantirish strategiyasi doirasida amalga oshirilayotgan islohotlarni qo‘llab-quvvatlashini bildirdi.

Keyingi yillarda O‘zbekistonning BMT tuzilmalaridagi ishtiroki faollashgani mamnuniyat bilan qayd etildi. Mamlakatimiz tashabbusi bilan BMT Bosh Assambleyasining mintaqaviy hamkorlik va o‘zaro bog‘liqlikni ilgari surishga qaratilgan beshta rezolyutsiyasi qabul qilindi.

O‘zbekiston 2020-2021 yillarda FAO'ning Yevropa va Markaziy Osiyo bo‘yicha 32-mintaqaviy konferensiyasida raislik qilgani, BMTning Inson huquqlari bo‘yicha kengashiga a’zo bo‘lib kirgani, UNESCO'ning kichik yoshli bolalar tarbiyasi va ta’limi bo‘yicha jahon konferensiyasi va Jahon sayyohlik tashkilotining (UN WTO) Bosh assambleyasini o‘tkazishni rejalashtirayotgani alohida ta’kidlandi.

Tomonlar Orol dengizi halokatining oqibatlarini yumshatish, Afg‘onistonda tinchlik o‘rnatish va afg‘on xalqiga ko‘maklashish loyihalarini amalga oshirish, Markaziy Osiyoda barqaror taraqqiyotni ilgari surish va o‘zaro bog‘liqlikni mustahkamlash borasidagi hamkorlikni mustahkamlashga kelishib oldilar.


Maqola muallifi

Teglar

Shavkat Mirziyoev

Baholaganlar

38

Reyting

3.1

Maqolaga baho bering

Doʻstlaringiz bilan ulashing