Shakira ilk bor Saudiyada konsert beradi

28 oktyabr kuni Ar-Riyodda start olishi mo‘ljallangan festival doirasida kolumbiyalik mashhur qo‘shiqchi Shakira Saudiya Arabistonidagi ilk konsertini beradi.  Bu haqda SEE nashri xabar berdi. 

Unga ko‘ra, ushbu festivalda ishtirok etish uchun, xonandalardan tashqari sport yulduzlari ham taklif etilgan.

Saudiya Arabistoni Bosh ko‘ngilochar boshqarmasi rahbari Turkiy al-Shayx ijtimoiy tarmoqlardagi sahifasida ushbu tadbir haqida qisqacha ma’lumot bergan.

“Bu yilgi mavsumning tantanali ochilish marosimida dunyoning eng mashhur tadbir tashkilotchilari va dunyo yulduzlari ishtirok etadi. Shu kuni og‘ir vazn toifasidagi taniqli bokschilar o‘rtasidagi kamar jangi ham bo‘lib o‘tadi", degan u. 

Al-Shayx, shuningdek, Ar-Riyodda futbol afsonalariga bag‘ishlangan birinchi va eng yirik muzeylardan biri – “Afsonalar muzeyi”  ochilishini ham eslatgan. 

Muzeyda Krishtianu Ronaldu atrofida yaratilgan CR7 Experience eksklyuziv taqdimoti bo‘ladi hamda tashrif buyuruvchilar Ronalduning hayotiy hikoyasini tomosha qilishi va uning imzosi qo‘yilgan sovg‘alarni olishi mumkin. Bundan tashqari, futbolchining barcha sovrinlari, shaxsiy yodgorliklari hamda interaktiv tajribalari bilan tanishish imkoni beriladi.

Eslatib o‘tamiz, avvalroq boks bo‘yicha og‘ir vazn toifasidagi chempionlar Tayson Fyuri va Aleksandr Usikning jangi Saudiya Arabistonining Ar-Riyod shahrida  tashkillashtirilishi haqida xabar bergandik.