Sarimsoqpiyoz koronavirusga qarshi eng yaxshi vaksinami?

Koronavirusning oldini olish uchun turli antibiotiklarni ichish tavsiya etilmaydi. Immunitetni ko‘taradigan dorilar virusni o‘ldirmaydi. Bu haqda Vazirlar Mahkamasi huzuridagi sanitariya-epidemiologiya davlat nazorati inspeksiyasi rahbari, tibbiyot fanlari doktori, professor Nurmat Otabekov ma’lum qildi.

"Yuqumli kasalliklarning oldini olish, ya’ni profilaktika uchun antivirus dorilarini va antibiotiklarni ichish umuman tavsiya etilmaydi. Bu kabi dorilarni, qolaversa, immun tizimini ko‘taradigan har-xil dorilarni tavsiya qilish – bu umuman noto‘g‘ri. Immun tizimini ko‘taradigan dorilar virusga qarshi hech qanday ta’sir kuchiga ega emas", deydi professor.

Otabekov, shuningdek, ijtimoiy tarmoqlarda sarimsoqpiyoz borasida tarqalayotgan tavsiyalarga ham o‘z munosabatini bildirdi.

Professor sarimsoqpiyozni iste’mol qilish mumkinligini, lekin bir jihatga e’tibor berish kerakligini eslatib o‘tdi: ya’ni sarimsoqpiyoz bir vaqtning o‘zida antibakterial yoki antivirus preparat emas. Shuni hisobga olgan holda, sarimsoqpiyozni boshqa ko‘katlar bilan aralashtirgan holda iste’mol qilish mumkin, dedi professor.

Otabekov O‘zbekiston aholisini ijtimoiy tarmoqlarda har-xil nomutaxassislar tomonidan berilayotgan tavsiyalarga ishonmaslikka chaqirdi.

Eslatib o‘tamiz, ayni vaqtda O‘zbekistonda ushbu virus bilan og‘riganlar 11 kishini tashkil etmoqda. Mamlakatda 2100 kishi karantinga olingan. 

Hurmatli fuqarolar, koronavirus bilan bog‘liq vaziyat sabab vahima ko‘tarishga asos yo‘q. Virusni yuqtirib olmaslik uchun sanitariya-gigiyena qoidalariga rioya qiling.