Samarqandda o‘quvchini urgan o‘qituvchi ishdan bo‘shatildi

Samarqand shahridagi maktabda dars jarayonida o‘qituvchi o‘quvchini urgani uchun ishdan bo‘shatildi. Bu haqda Bolalar ombudsmani xabar berdi.

Aniqlanishicha, joriy yilning 21 aprel kuni Samarqand shahridagi 35-umumta’lim maktabi 7-sinfida kimyo darsi vaqtida o‘qituvchi Sh.M. darsga kech kelgan va mashg‘ulotlarni o‘tishda xalaqit qilgani vaji bilan o‘quvchi H.D.ga jahl bilan tashlanib, (uni go‘yoki direktor huzuriga olib bormoqchiligini aytib) bolaga nisbatan tazyiq va zo‘rlik harakatlarini qilgan.

Joriy yilning 23 aprel kuni maktab ma’muriyati tomonidan o‘z kasbiy vazifasiga zid bo‘lgan nomaqbul harakatlar sodir etgani uchun o‘qituvchi Sh.M. bilan tuzilgan mehnat shartnomasi bekor qilingan.

Bildirilishicha, holat yuzasidan hozirda tuman IIB tomonidan tergovga qadar tekshiruv harakatlari olib borilmoqda. Bu borada qo‘shimcha tarzda ma’lumot beriladi. Vaziyat Bolalar ombudsmani tomonidan nazoratga olingan.

Eslatib o‘tamiz, avvalroq Toshkent shahar Sergeli tumanidagi xususiy maktabda 7-sinf o‘quvchisini urgan o‘qituvchi 1,5 mln so‘m jarimaga tortilgandi.