Тошкентда ўқувчини урган хусусий мактаб ўқитувчиси жазоланди

Тошкент шаҳар Сергели туманидаги хусусий мактабда 7-синф ўқувчисини урган ўқитувчи 1,5 млн сўм жаримага тортилди. QALAMPIR.UZ суд ҳужжати билан танишди.

Ҳужжатга кўра, А.Т. жорий йил 4 апрель куни Сергели тумани “Софдил” МФЙ ҳудудида жойлашган “New First School” МЧЖга қарашли “Мударрис” хусусий мактаб биносида 7-синф ўқувчиси А.А.нинг турли жойларига уриб, тан жароҳати етказгани сабабли боланинг отаси Ш.М. ИИОга мурожаат қилган. Судга оид тиббий экспертизанинг жорий йил 17 апрелдаги хулосасида А.А.нинг олган тан жароҳати енгил тан жароҳатлар тоифасига кириши кўрсатилган.

Бугун, 23 апрель куни жиноят ишлари бўйича Сергели туман судида мазкур иш кўриб чиқилган. Унда кўрсатма берган ўқитувчи А.Т. 4 апрель куни мактабда тадбир бўлгани ва унда А.А. баланд овозда гапиргани ҳамда ўзига нисбатан беписандлик қилгани учун унинг бошидан ва кўкрагидан урганини айтиб, суддан енгиллик сўраган.

Судда А.Т. Маъмурий жавобгарлик тўғрисидаги кодекснинг 52-моддаси (Енгил тан жароҳати етказиш) 2-қисмида кўрсатилган ҳуқуқбузарликни содир этганликда айбли деб топилган ва унга шу модда билан БҲМнинг 4 баравари, яъни 1,5 млн сўм жарима жазоси тайинланган.

Эслатиб ўтамиз, аввалроқ Сурхондарё вилояти Шеробод туманидаги 45-сонли умумий ўрта таълим мактабида ўқувчилар мактабда экин майдонидаги мавсумий гулларни пайҳон қилгани сабабли бошланғич синф ўқитувчиси томонидан танбеҳ берилиб, боланинг бош қисмига тарсаки туширилганди.