Saida Mirziyoyeva o‘g‘il farzandli bo‘ldi

O‘zbekiston Respublikasi Prezidenti Shavkat Mirziyoyevning to‘ng‘ich qizi, Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi o‘rinbosari Saida Mirziyoyeva o‘g‘il farzandli bo‘ldi. U farzandiga Shavkat deb ism qo‘ygan. 

“Barchamiz uchun hali-hamon qiyin bo‘lsa-da, hayot davom etmoqda. Odamlar to‘ylarda xursandchilik qilmoqda, bolalar dunyoga kelmoqda. Biz ham ko‘payishdik — jajji Shavkatjon, bizning quyoshimiz. Biz u bilan yaqinda tanishdik, lekin birinchi uchrashuvimizdayoq o‘rtada shunchalar kuchli muhabbat paydo bo‘ldiki, biz kuniga 24 soat birga bo‘lamiz :) Onalar buning nima ekanini bilishadi.

Men esa muhabbatning ayollarga barcha dilxiraliklarga dosh berishi va kechirishiga yordam beruvchi kuch ekani haqida o‘ylayman. Baxtli va eng yaxshi damlarni kutish, bolalar o‘sib-ulg‘ayguncha yonida bo‘lish, ularga tayanch bo‘lish va keyin tin olish mumkin. Nima qilsak ham, bizni doim muhabbat boshqaradi”, deb yozadi Saida Mirziyoyeva ijtimoiy tarmoqdagi sahifasida.

QALAMPIR.UZ to‘plagan ma’lumotlarga ko‘ra, Saida Mirziyoyeva joriy yilning 24 iyul kuni – Prezident Shavkat Mirziyoyevning tug‘ilgan kunida uchinchi farzandini dunyoga keltirgan. 

“Hozir o‘g‘lim bilan ertaklar emas, balki yangiliklar sadosi ostida uxlayapmiz. Xotin-qizlar va jurnalistlarga nisbatan sudlov mexanizmi tezkor va shiddatli bo‘lib, bor kuchi bilan ishlayotganini ko‘rish men uchun og‘ir. Erkaklar va amaldorlarga kelganda bu tizim ko‘pincha to‘xtab qoladi. Bir vaqtning o‘zida haqoratlarga munosib javob uchun ozodlikdan mahrum qilish va sakkiz yillik xo‘rlik ostida yashaganlarni yarashuv bilan «jazolash» mumkin emas. Qiz bolaga ojiza va itoatkor bo‘lgani uchungina buyumdek qarash, dili og‘rigan-og‘rimaganini uning uchun hal qilish mumkin emas. Shaxsiy fikri uchun ta’qib qilish mumkin emas. Agar biz adolat tarafdori bo‘lsak, qonun ikkala tomon uchun bir xil ishlasin. Agar biz baxtli mamlakatda yashashni istasak, ayollarni erkaklar prioritetlaridan, jurnalistlarni esa bosimdan himoya qilishimiz kerak.

Ayollarga kelsak: qo‘limizda bola bo‘lganida, har bir jabhada erkaklar bilan tenglashish biz uchun shundoq ham qiyin, har birimiz farzand tug‘ilganida kareramizning bir necha yilini yo‘qotamiz. Shunga qaramay, ba’zan bizga yana ayblov ham qo‘yishadi”, deydi Mirziyoyeva. 

U so‘zida davom etarkan, 4 yil ilgari Prezident Mirziyoyev tomonidan ilgari surilgan g‘oyalar haqida shunday deydi:

“To‘rt yil oldin Prezidentimiz so‘z erkinligini yoqlab chiqdi, mamlakatimiz bundan buyon toqat qilmas ekanmiz, sukut saqlab o‘tirmaymiz, degan xulosaga keldi. Shuni yodda tutishimiz kerakki, endilikda har bir noxush holat jamoatchilikka oshkor bo‘lmoqda: biz kichik jinoyatlar uchun ham barcha mumkin bo‘lgan moddalar bilan og‘ir jazoni qo‘llash holatlariga guvoh bo‘lyapmiz. Agar kimlargadir buning aksi kerak bo‘lsa, jazo yumshaydi va yengillashadi. Odamlar buni ko‘rib turibdi, muhokama qilishyapti va adolatga ishonmay qo‘yishyapti.

Men jurnalist va blogerlar sukut saqlamasligiga va boshlangan islohotlarni davom ettirish yo‘lida hissa qo‘shishiga qat’iy ishonaman. Jamoatchilik fikrining kuchiga ishonaman. Oldinda bizni yaxshi kunlar kutayotganiga ishonaman. Agar har kim o‘z obro‘ini saqlagan holda odamlar bilan hisoblashsa, hamma ish adolatli va to‘g‘ri bo‘ladi.

Prezident topshirig‘iga ko‘ra, ayni kunlarda tuhmatni dekriminallashtirish hamda jurnalistlar faoliyatiga to‘sqinlik uchun javobgarlikka oid ikki muhim qonun hujjati ishlab chiqish arafasida.

Bu oshkora jamiyat sari tashlangan yana ikki katta qadam bo‘ladi. Keling, buni birgalikda amalga oshiramiz”.