Ro‘ziboyevga qanday avtomobil sovg‘a qilindi. Jetour yoki Exeed? (video)

Ijtimoiy tarmoqlarda o‘zbekistonlik UFC jangchisi Nursulton Ro‘ziboyevning Exeed rusumidagi avtomobil oldida turgani aks etgan video tarqaldi. Video ostida Checheniston rahbari Ramzan Qodirovga qarashli “Axmat” klubi Ro‘ziboyevga yangi Exeed avtomobilini sovg‘a qildi, degan mazmundagi izohni ko‘rish mumkin.

Ro‘ziboyevning QALAMPIR.UZ'ga ma’lum qilishicha, sportchi Exeed avtosaloniga reklama bilan bog‘liq masala bo‘yicha borgan. Unga hech kim Exeed avtomobilini sovg‘a qilmagan. Qodirov haqiqatdan ham o‘zbekistonlik sportchiga Jetour rusumidagi mashinani bergan.

“Exeed avtosaloniga reklama uchun borgandim. “Axmat” tomonidan menga Jetour berildi. Internetda xato talqin ketdi”, deydi Ro‘ziboyev. 

Qayd etish joiz, Jetour avtomobili Qodirovning Ro‘ziboyevga birinchi sovg‘asi emas. Bungacha ham Checheniston rahbari o‘zbekistonlik sportchiga mashina hadya qilgan. Jumladan, 2017 yilda Ro‘ziboyev Rossiyadagi turnirda qozog‘istonlik Axmad Janchurayevni yutganidan keyin, Qodirov Ro‘ziboyevga Jeep sovg‘a qilgan. 

Shuningdek, o‘z vaqtida Ro‘ziboyev “Axmat” klub nomidan janglar o‘tkazib, yaxshi natijalarga erishgani uchun Ramzan Qodirov unga O‘zbekistonda klub fillialini ochishga ruxsat bergan. Bir necha yillardan buyon Andijon viloyati, Shahrixon tumanida “Axmat” klub filliali faoliyat yuritib kelmoqda.

Eslatib o‘tamiz, avvalroq Ro‘ziboyevning UFC'dagi 2-jangi qachon o‘tkazilishi xabar qilingandi. O‘zbekistonlik sportchi bo‘lajak jangida braziliyalik Kayo Borraloga qarshi oktagonga chiqadi. O‘tgan yili oktyabr oyida o‘zbekistonlik yana bir sportchi Mahmud Murodov aynan Borraloga qarshi jang o‘tkazib, ochkolar hisobiga ko‘ra mag‘lub bo‘lgandi.