Rossiyalik mashhur xonanda Leopard'ni yo‘q qilgan askarga million rubl berdi (video)

Rossiyalik qo‘shiqchi Grigoriy Leps nemis tanki Leopard'ni yo‘q qilgan harbiyga million rubl mukofot puli berdi. Bu haqda u o‘zining Telegram-kanalida ma’lum qildi. 

Xonandaning Telegram-kanaliga joylangan videoda Rossiya harbiy qo‘shinlarining bayroqlari fonida so‘zlayotgan odam Leps unga Leopard tankini yo‘q qilgani uchun million rubl berganini aytgan. Qo‘shiqchi video ostida “men gapimga javob berdim”, deya izoh qoldirgan. 

Ma’lumot uchun, rossiyalik san’atkorlar Grigoriy Leps va Nikolay Baskov joriy yilning 14 iyun kuni Ukraina Qurolli Kuchlariga tegishli tanklarni yo‘q qilgan har bir kishiga shaxsiy hisobidan million rubldan berishini ma’lum qilgandi. Keyinroq mazkur tashabbusga teleboshlovchi Yuliya Baranovskaya hamda “Zemlyane” rok-guruhi rahbari Vladimir Kiselev ham qo‘shildi.

Eslatib o‘tamiz, avvalroq Novosibirsk viloyatidan senator Aleksandr Karelin tomonidan Rossiya Qurolli Kuchlari harbiysi Andrey Kravsovga Ukrainadagi urushda Leopard tankini yo‘q qilgani uchun million rubl mukofot puli berilgandi.