Rossiyadagi savdo markazida portlash bo‘ldi

Rossiyaning Vladikavkaz shahridagi Moskovskoye shosseda joylashgan “Alania Mall” savdo markazida portlash va yong‘in sodir bo‘ldi. Bu haqda Rossiya Favqulodda vaziyatlar vazirligi xabar berdi.

Shimoliy Osetiya gubernatori Sergey Menyaylo savdo markazida tezkor shtab tashkil etilganini aytgan.

“Men “Alania Mall” savdo markazi hududiga bordim, u yerda yong‘in sodir bo‘lgan joyda tezkor shtab joylashtirildi, huquq-tartibot idoralari xodimlari va qutqaruv xizmatlari ishlamoqda”, degan u.

Qayd etilishicha, yong‘in maydoni 800 kvadrat metrni tashkil etgan. Yong‘inga uchinchi murakkablik darajasi berilgan.

Dastlabki ma’lumotlarga ko‘ra, savdo markazidagi favqulodda holatga oziq-ovqat kortidagi gaz ballonining portlashi sabab bo‘lgan bo‘lishi mumkin. Yong‘in oqibatida bir kishi halok bo‘lgan, to‘qqiz kishi yaralangan.

Eslatib o‘tamiz, avvalroq Turkiya g‘arbida joylashgan Balikesir shahridagi zavodda portlash oqibatida 12 kishi halok bo‘lgandi.